7 qarasha kúni Almatydaǵy Sh.Sh. Ýálıhanov atyndaǵy Tarıh jáne etnologıa ınstıtýtynda «1920-1930 jyldardaǵy panasyz balalar tarıhynyń zerttelýi men problemalary» atty ǵylymı-ádistemelik semınar ótti, - dep habarlaıdy alnews.
İs-sharada 1920-1930 jyldardaǵy otandyq jáne sheteldik tarıhnamada Qazaqstan men kórshiles elder aýmaǵyndaǵy balalar panasyzdyǵy problemasy jan-jaqty talqylandy. Sondaı-aq zertteý taqyryby boıynsha jańa derekterdi anyqtaý, jınaý jáne olardy ǵylymı aınalymǵa engizý máseleleri qarastyryldy.
Atalǵan semınarǵa ınstıtýttyń bas dırektory QR UǴA akademıgi, t.ǵ.d., profesor Z.E.Qabyldınov, dırektordyń ǵylym jónindegi orynbasary, t.ǵ.k., Sh. Baıanuly, ınstıtýt dırektorynyń syrtqy baılanystar jónindegi orynbasary, t.ǵ.k., J.J. Jeńis jáne ǵalym hatshy N. Qurmanalına men t.ǵ.d., profesor O.H. Muqatova qatysty.
Semınar «1920-1930 jyldardaǵy Qazaqstan aýmaǵyndaǵy jáne irgeles elderdegi balalar panasyzdyǵy máselesi» atty jobanyń aıasynda ótip otyr. Onlaın jáne offlaın formatta ótken ǵylymı-ádistemelik semınarǵa qyzyǵýshylyq tanytqan otandyq tarıhshylar men belsendi azamattar qatary kóp boldy.
Zulmat jyldardaǵy panasyz balalardyń máselesi týraly semınardyń alǵysózin bastaǵan ınstıtýttyń Bas dırektory Z.E. Qabyldıov, HH ǵǵ. 20-30 jyldaryndaǵy túrli sebepterge baılanysty ata-anasynan aırylǵan panasyz balalardyń jaǵdaıyn baıandady. Saıası zulmat jáne asharshylyq jyldary kórshi elderge kóshýge májbúr bolǵan azamattardyń balalarynyń keıbiri keıin sol eldiń maqtanyshty tulǵasyna aınalǵanyn da dáıekti mysaldarmen keltirip olardyń qıly taǵdyryna taldaý jasady.
Sonymen birge atalǵan taqyrypty zertteýdiń teorıalyq jáne metodologıalyq tásilderin jetildirýdiń mańyzdylyǵy men ózektiligi jáne taqyrypty zertteýde saqtalǵan keıbir túıitkilderdiń sebepterine taldaý jasaǵan t.ǵ.d., profesor O.H. Muqatova baıandama barysynda “panasyz balalar” termınine de jeke toqtaldy. Sonymen birge panasyz balalar máselesi boıynsha zerttelgen otandyq jáne sheteldik tarıhnamaǵa sholý jasap, sol jyldardaǵy merzimdi baspasózde jarıalanǵan maqalalardy zertteýdiń maǵyzdylyǵy týraly aıtty.
Baıandamadan sońǵy talqylaý barysynda tarıh ǵylymdarynyń kandıdaty J.J. Jeńis pen G.Ú. Orynbaeva, PhD doktor M.M. Qozybaeva, tarıh magıstri A.A. Bekenova, doktorant E. Saýyrqan óz pikirlerin bildirip, baıandama taqyrybyna qatysty saýaldaryn qoıdy. Qaraǵandy ýnıversıtetiniń oqytýshysy T.Sakabaı óziniń atalǵan taqyryp týraly zertteý nátıjesimen bólisti. PhD doktor M.M.Qozybaeva asharshylyq kezinde Qyrǵystan, Batys Sibir, Ońtústik Sibirge t.b. shektes jerlerge ketken qazaq balalarynyń taǵdyryn zertteı otyryp, sol elderdegi balalar qamqorsyzdyǵymen kúrestiń qalaı júrgizilgendigine salystyrmaly taldaý jasaý qajettigin atap ótti.
