Budan eki apta turyn AQSH memlekettik hatshysy Entonı Blınken Beıjińge saparlaı barǵan. Ol Qytaı bıligin Reseıdiń Ýkraınadaǵy soǵysyn qoldamaýǵa, áskerı jáne azamattyq maqsatta paıdalanýǵa bolatyn taýarlardy eksporttamaýǵa shaqyrǵan bolatyn. Pýtın men Sı kezdesýinen keıin Máskeý men Beıjiń óziniń qarym-qatynastaryn turaqty damyta beretinin baıqatty. Tipti Qurama Shtattardy jahandyq turaqtylyqqa qaýip tóndirip otyrǵanyn da meńzedi.
Birlesken málimdemede: "AQSH óziniń absolútti áskerı artyqshylyǵyn saqtaý úshin strategıalyq turaqtylyqqa nuqsan keltirý áreketine taǵy da eleýli alańdaýshylyq bildiremiz" degen sózder kezdesedi.
Buǵan qosa AQSH tóndirgen qaýipsizdik qaterleri qatarynda mynalardy ataǵan:
Amerıka Qurama Shtattary «jahandyq zymyranǵa qarsy júıeni quryp, zymyranǵa qarsy júıelerdi búkil álemde jáne ǵaryshta ornalastyrady; Joǵary dáldiktegi ıadrolyq emes qarýlardyń qabiletin kúsheıtedi; Basqa taraptardyń áskerı operasıalaryn, soqqy jasaý múmkindikterin joıýǵa tyrysýda; NATO-ny kúsheıtip, Eýropalyq keıbir odaqtastarymen «ıadrolyq bólisý» kelisimin júzege asyrýda; Ulybrıtanıa jáne Avstralıamen ıadrolyq súńgýir qaıyqtardy damytý men paıdalaný boıynsha yntymaqtastyqty júzege asyrýda; Azıa-Tynyq muhıty men Eýropadaǵy odaqtastaryna qurlyqtaǵy qysqa jáne orta qashyqtyqtaǵy zymyrandardy ornalastyrý, qamtamasyz etý josparlaryn júzege asyryp keledi" delingen.
Máskeý men Beıjiń ózara qarym-qatynastaryn damytý áreketteri úshinshi jaqqa baǵyttalmaǵanyn aıtty. Degenmen, eki el arasynda yntymaqtastyq taǵy da jańa deńgeıge qaraı kóterile túskenin kórýge bolady. Bul olarmen básekeles ózge de derjavalarmen bolǵan shıelenistiń tipti de kúsheıe túsetininen derek beredi.
