Konstıtýsıalyq reforma jónindegi komısıanyń 12-shi otyrysynda Qazaqstan Respýblıkasy Parlamenti Májilisiniń depýtaty, «Respublisa» partıasy fraksıasynyń jetekshisi Aıdarbek Qojanazarov jańa Konstıtýsıa jobasyn qoldaıtynyn málimdedi jáne onyń elimizdiń ary qaraı damýy úshin strategıalyq mańyzǵa ıe ekenin atap ótti.
«Usynylyp otyrǵan Konstıtýsıa jobasy daıyn úlgilerdiń kóshirmesi emes. Iá, biz halyqaralyq tájirıbeni zerdelep, kásibı qaýymdastyqpen keńestik. Alaıda túpkilikti mátin – derbes tańdaýymyzdyń nátıjesi. Ol bizdiń qoǵamnyń qundylyq negizderin beıneleıdi, tarıhı sabaqtastyqty saqtaıdy ári jańa syn-qaterlerdi eskeredi», – dedi depýtat.
Qujattyń mazmuny týraly toqtalǵan Qojanazarov egemendiktiń ıesi ári bıliktiń birden-bir bastaýy – halyq ekenin atap ótti. Memlekettiń turaqtylyǵy kelisim men yntymaqqa negizdeledi. Onyń aıtýynsha, bolashaq damý baǵyttary men sıfrlyq transformasıaǵa erekshe kóńil bólingen. Sonymen qatar ol basqarý qurylymyndaǵy ózgeristerge de toqtaldy.
«Bir palataly Parlament – Quryltaı qalyptastyrylady, onyń baqylaý fýnksıalary kúsheıtiledi. Partıalardyń mańyzy artyp, olardyń qoǵam aldyndaǵy saıası jaýapkershiligi kúsheıedi. Bul qadamdar ınstıtýsıonaldyq tepe-teńdikti qamtamasyz etýge baǵyttalǵan», – dedi fraksıa jetekshisi.
Sóz sońynda Aıdarbek Qojanazarov jańa Ata Zań uzaq merzimdi ınstıtýsıonaldyq jańǵyrý quraly ekenin jetkizdi.
«Jalpy alǵanda, jańa Konstıtýsıa – jaı ǵana quqyqtyq qujat emes. Bul – ınstıtýttardy jańartýǵa arnalǵan qural. Biz ókilettik pen jaýapkershilik arasyndaǵy sáıkestik, strategıalyq jaýapkershilik pen qoǵamdyq senim qalypty qaǵıdaǵa aınalatyn, myqty, ádiletti ári turaqty Qazaqstannyń negizin qalaımyz», – dep túıindedi ol.
