Jańa Konstıtýsıa jobasy memlekettiń áleýmettik sıpatyn kúsheıtip, saıasattyń ózegine adamdy qoıa otyryp, azamattardyń qoǵamdyq ómirge belsendi qatysý múmkindigin keńeıtedi. Konstıtýsıalyq reforma jónindegi komısıanyń kezekti otyrysynda Ata Zań jobasyn qoldaý jónindegi ustanymy men dáıekterin Jalpyulttyq sosıal-demokratıalyq partıasynyń tóraǵasy Asqat Rahymjanov málimdedi.
Ol Konstıtýsıa jobasy eń aldymen ádildikke, teńdikke, quqyqtardy qorǵaýǵa jáne memlekettiń halyq aldyndaǵy jaýapkershiligin arttyrýǵa baǵyttalǵanyn atap ótti.
«Qoǵamdyq birlestikterdiń qyzmet etý erkindigin bekitý jáne azamattardyń qoǵamdyq ómirge qatysý aıasyn keńeıtý – naǵyz azamattyq qoǵamdy damytýǵa jol ashady. Mundaı qoǵamda kásipodaqtar, qoǵamdyq uıymdar men bastamashyl toptar eńbek adamdarynyń, jastardyń jáne áleýmettik osal sanattaǵy azamattardyń múddelerin erkin qorǵaı alady. Bul – teń múmkindikter men memlekettiń áleýmettik jaýapkershiligi qaǵıdattarymen tikeleı baılanysty», – dedi JSDP tóraǵasy.
Sonymen qatar, Asqat Rahymjanov osynaý konstıtýsıalyq normalar mańyzy adam múddesine baǵdarlanǵan ornyqty saıasattyń negizin qalyptastyrý úshin mańyzdy ekenin jetkizdi.
«Memlekettik sheshimder qabyldanǵanda bolashaq urpaqtyń múddesi mindetti túrde eskerilýi kerek. Ásirese eńbek, jumyspen qamtý, ekologıa jáne áleýmettik qorǵaý salalarynda bul óte mańyzdy. Osyǵan baılanysty usynylyp otyrǵan konstıtýsıalyq normalar turaqty ári adam múddesin basty orynǵa qoıatyn saıasattyń negizin qalyptastyrady», – dep túıindedi sózin komısıa múshesi.
