Jańa Konstıtýsıanyń jobasy kásibı zańgerlerdiń, ártúrli sala sarapshylarynyń jáne azamattyq qoǵam ókilderiniń uzaq ári júıeli jumysy nátıjesinde ázirlendi. Bul týraly Konstıtýsıalyq reforma jónindegi komısıanyń segizinshi otyrysynda Májilis depýtaty, «Respublika» partıasynyń jetekshisi Aıdarbek Qojanazarov málimdedi, - dep habarlaıdy alnews.
Aıdarbek Qojanazarov, reformany talqylaý alty aıdan astam ýaqyt boıy júrgizilgenine toqtaldy. Osy kezeń ishinde júzdegen, myńdaǵan azamat óz usynystaryn joldady. Komısıa músheleri ǵana emes, jurtshylyq ta bul qujatty qazirgi zaman talaptaryna tolyq jaýap beretin, tereń oılastyrylǵan jáne eldiń uzaq merzimdi damý baǵdaryn aıqyndaıtyn mańyzdy qujat retinde baǵalap otyr. Soǵan oraı ol jańa Konstıtýsıanyń jobasyn referendýmǵa shyǵarýdy usyndy.
«Konstıtýsıalyq komısıanyń múshesi retinde jekelegen baptardyń redaksıasy pysyqtalǵannan keıin jańa Konstıtýsıa jobasyn jalpyhalyqtyq daýys berýge – referendýmǵa shyǵarýdy usynamyn», – dedi depýtat.
Sondaı-aq, ol ulttyq valúta mártebesin Ata zańda bekitý týraly da málimdedi. Bul el azamattary tarapynan túsken usynystyń biri. Ulttyq valútanyń bolýy – memlekettiń ekonomıkalyq táýelsizdigi men egemendigin aıqyndaıtyn negizgi kórsetkishtiń biri sanalady.
«Ulttyq valútanyń mártebesin Konstıtýsıa deńgeıinde bekitý – teńgeniń ınstıtýsıonaldyq mańyzyn naqtylap, qarjy-valúta aınalymy salasyndaǵy memlekettik saıasattyń sabaqtastyǵyn qamtamasyz etedi. Sonymen qatar, ulttyq valútamyzdy Konstıtýsıada bekitý arqyly bolashaqta ártúrli alypqashpa pikirler men alypsatarlyq áńgimelerdiń aldyn alar edik», – dep naqtylap ótti depýtat.
Aıdarbek Qojanazarovtyń aıtýynsha, qazir teńge mártebesi zańmen rettelgen. «Qazaqstan Respýblıkasynyń Ulttyq Banki týraly» zańǵa sáıkes ulttyq valúta – teńge. Alaıda álemdik qarjy júıesi ózgerip jatqan jaǵdaıda bul máseleni Konstıtýsıa deńgeıinde naqtylaý asa mańyzdy.
«Bul – halyqaralyq tájirıbede bar dúnıe. Máselen, Ázirbaıjan Respýblıkasy Konstıtýsıasyna sáıkes, Ázirbaıjan Respýblıkasynyń aqsha birligi retinde manat belgilengen. Sol sıaqty, Armenıa Konstıtýsıasynda ulttyq valútanyń armán dramy ekeni tikeleı jazylǵan. Al Qyrǵyzstan Konstıtýsıasynda ulttyq aqsha birligi som dep naqty kórsetilgen. Sondyqtan Konstıtýsıada «Qazaqstannyń ulttyq valútasy – teńge» dep naqty bekitý óte oryndy dep sanaımyn. Osyǵan baılanysty atalǵan túzetýdi Konstıtýsıa jobasyna engizýdi Komısıa qaraýyna usynamyn», – dep túıindedi sózin Májilis depýtaty.
