Qazaqstan Respýblıkasy Kásipodaqtar federasıasynyń tóraǵasy Satybaldy Dáýletalın Konstıtýsıalyq komısıanyń 10-otyrysynda jańa Ata Zań jobasy áý bastan-aq onyń qoǵamǵa jáne árbir azamattyń ómirine uzaq merzimdi áseri eskerile otyryp ázirlengenin alǵa tartty.
Onyń aıtýynsha, kásipodaqtar úshin bul úderistiń ashyqtyǵyn qamtamasyz etý, talqylaýǵa jumys isteıtin halyqty tutastaı tartýdyń mańyzy erekshe.
«Kásipodaqtardyń shamamen eki mıllıon múshesiniń ókili retinde bul qujatty talqylaý komısıa men sarapshylar ortasynyń aıasynda ǵana qalmaýy men úshin asa mańyzdy boldy», – dedi Satybaldy Dáýletalın.
Óńirlerde jáne eńbek ujymdarynda ótken talqylaýlar barysynda adal eńbek etip júrgen adamdardyń kúndelikti ómirine tikeleı qatysty máseleler kóterilgen.
«Talqylaý azamattarmen betpe-bet, keıde qyzý pikirtalas túrinde, biraq shynaıy áńgime sıpatynda ótti. Adamdar eńbek qaýipsizdigi, balalarynyń bolashaǵy týraly aıtty. Kásipodaqtar federasıasy jańa Konstıtýsıa jobasyn qoldady. Sebebi ol kóp jaǵdaıda biz eńbek adamdarynan estip otyrǵan oı-pikirlermen sáıkes keldi», – dep tolyqtyrdy spıker.
Óz sózinde ol áleýmettik memleket qaǵıdatyna jáne adamnyń eń joǵary qundylyq retinde bekitilýine de nazar aýdardy. Kásipodaqtar federasıasy tóraǵasynyń pikirinshe, bul – memlekettik sheshimder úshin negizgi baǵdar.
«Alǵashqy baptyń ózinde-aq Qazaqstan áleýmettik memleket retinde aıqyndalyp, eń joǵary qundylyq retinde adam, onyń ómiri, quqyqtary men bostandyqtary atalady. Jaldamaly jumysker úshin bul – asa mańyzdy belgi. Memleket endi sandar men esepterdiń aınalasynda emes, eńbek etip, ónim óndiretin, elimizdiń turaqtylyǵyn qamtamasyz etetin adamdar aınalasynda qurylady», – dedi Satybaldy Dáýletalın.
Eńbek quqyqtary týraly aıta kele, Satybaldy Dáýletalın ekonomıkalyq jáne tehnologıalyq ózgerister kezeńinde jumyspen qamtý salasyna jáne eńbek jaǵdaılaryna memleket jaýapkershiliginiń sapalyq turǵydan ózgergenine toqtaldy.
«Eńbek adamnyń jeke táýekeli retinde emes, laıyqty ómirdiń negizi retinde moıyndalady. Taǵy bir mańyzdy baǵyt – yntymaqtastyq qaǵıdaty. Munda ol óziniń naǵyz shynaıy mánine qaıta oralady. Bul – memleket, bıznes jáne eńbek arasyndaǵy yntymaqtastyq. Táýekeldi jumyskerdiń moınyna ile salý emes. Birjaqty jaýapkershilik te emes. Bul – memleket belsendi qatysýshy bola otyryp, adamdardyń turmys jaǵdaıyna jaýapkershilik alatyn múddelerdiń ádil teńgerimi. Jumysshy úshin bul, eń aldymen, erteńgi kúnge degen senim», – dep málimdedi spıker.
Sóz sońynda Satybaldy Dáýletalın aýyzbirshilik pen qoǵamnyń bir kisideı atsalysýy turaqty damýdyń negizgi tetigi ekenin taǵy eske saldy. Sondaı-aq, Konstıtýsıalyq komısıa múshelerine ashyq ári mazmundy dıalog úshin alǵys aıtty.
