Almaty qalasynyń Áýezov aýdanyndaǵy komúnıtı-ortalyqta Qazaqstan Respýblıkasynyń jańa Konstıtýsıa jobasyn talqylaýǵa arnalǵan qala jastarynyń qatysýymen ıntellektýaldy Meet-up ótti. Kezdesý Májilis depýtattaryn, Konstıtýsıalyq reforma jónindegi komısıa múshelerin, sarapshylardy jáne jas belsendilerdi biriktirip, jasandy ıntellekt quraldaryn paıdalaný arqyly ınteraktıvti formatta uıymdastyryldy, - dep habarlaıdy alnews.
İs-shara ashyq dıalog alańyna aınalyp, onda jastar tek suraq qoıyp, óz pikirlerin bildirip qana qoımaı, olardy jasandy ıntellekttiń analıtıkalyq qorytyndylarymen salystyrdy. Baǵdarlamanyń erekshe bóligi retinde almatylyq jastar arasynda konstıtýsıalyq batl ótkizildi.
Talqylaýǵa Konstıtýsıalyq reforma jónindegi komısıa músheleri, QR Parlamenti Májilisiniń depýtattary Aıdos Sarym, Janarbek Áshimjan, Únzıla Shapaq, jastar uıymdarynyń ókilderi, sarapshylar qaýymdastyǵy, komúnıtı-ortalyqtardyń, qoǵamdyq birlestikter men medıanyń basshylary qatysty. Qalanyń belsendi jastary jańa Konstıtýsıa jobasyn qoldap, engizilip otyrǵan jańashyldyqtardyń el bolashaǵy úshin mańyzdylyǵyn atap ótti.
Kezdesýdiń negizgi maqsaty — jańa Konstıtýsıa jobasyn jan-jaqty talqylaý, jastardyń azamattyq belsendiligin arttyrý, quqyqtyq mádenıetti damytý jáne zamanaýı tehnologıalardy qoldaný arqyly synı oılaý daǵdylaryn qalyptastyrý.
Jas ǵalym Ákejan Keńesov kezdesýdiń jańa formatynyń mańyzdylyǵyn atap ótti:
«Jasandy ıntellekt quraldaryn paıdalana otyryp júrgizilgen túsindirý jumystary jastarǵa konstıtýsıalyq reformalardyń mánin tereń ári qoljetimdi túsinýge múmkindik berdi. Mundaı alańdar quqyqtyq saýattylyqty arttyryp, ózekti qoǵamdyq máselelerdi ashyq talqylaýǵa jaǵdaı jasaıdy».
Óz kezeginde «Qamqor» qoǵamdyq qorynyń jetekshisi Baǵdat Anarbaeva Konstıtýsıa jobasynyń qundylyqtyq negizine toqtaldy:
«Jańa jobada “Ádiletti Qazaqstan” baǵdary men “Zań jáne tártip” qaǵıdaty aıqyn kórinis tapqan. Azamattardyń quqyqtary men bostandyqtarynyń basymdyǵy bekitilip, bul zańdylyqty nyǵaıtýǵa jáne qoǵamnyń memlekettik ınstıtýttarǵa degen senimin arttyrýǵa baǵyttalǵan».
Almaty qalasynyń volontórler front-ofısiniń jetekshisi Qymbat Nurdáýlet volontórlik qyzmetke qatysty ózgeristerge nazar aýdardy:
«Kez kelgen ózgeris durys túsindirilip, tıimdi júzege asyrylǵan jaǵdaıda ǵana oń nátıje beredi. Jańa Konstıtýsıada volontórlik pen qaıyrymdylyq qorlary salasyna qatysty ózgerister usynylyp otyr, bul volontórlik qyzmetti yntalandyrýǵa baǵyttalǵan. Búgin munda Almatydaǵy jastar uıymdarynyń kóshbasshylary men basshylary jınaldy, al almatylyq jastardyń pikiri salmaqty jáne mindetti túrde nátıjesin beredi dep oılaımyn».
Jas kásipker Aqarys Tórebekov is-shara formaty jastardyń zamanaýı suranysyna saı ekenin atap ótti:
«Búginde jasandy ıntellekt jastardyń ómirinde — oqýda, turmysta, kúndelikti sheshimder qabyldaýda — erekshe oryn alady. Bizde qatysýshynyń suraǵy, qatysýshynyń pikiri jáne jasandy ıntellekttiń pikiri bar. Jastar ne deıdi, JI ne aıtady jáne is-shara qonaqtary qandaı qorytyndy sheshimge keledi — sony kórý qyzyq. Jastar kózqarasy arqyly qalyptasqan ortaq pikir - qundy».
Májilis depýtaty Aıdos Sarym konstıtýsıalyq batlǵa qatysyp, kezdesýdiń formatyn joǵary baǵalady:
«Bul — óte jaqsy, jastarǵa laıyqty jáne zamanaýı format. Ózim úshin de qyzyqty boldy. Búginge deıin jańa Konstıtýsıa jobasy boıynsha azamattardan tórt myńnan astam usynys tústi. Olar Konstıtýsıalyq sottyń salystyrmaly kestelerinde ornalastyrylyp jatyr, ıaǵnı adamdar bul ózgeristerdiń teń avtorlaryna aınalýda».
İs-shara qorytyndysy boıynsha Konstıtýsıalyq reforma jónindegi komısıa músheleri jańa eldiń negizgi zańyn qoldaǵan Almaty jastarynyń belsendiligin joǵary baǵalady. Qatysýshylar konstıtýsıalyq bastamalardyń mánin tereń túsingenin kórsetti, al mundaı ıntellektýaldy ári ashyq formattar azamattyq jaýapkershilikti qalyptastyrýǵa jáne eldegi quqyqtyq reformalardy qoldaýǵa yqpal etetini atap ótildi.
