Májilis depýtaty, «Ardagerler uıymy» respýblıkalyq qoǵamdyq birlestiginiń tóraǵasy Baqtyǵoja İzmuhambetov jańa Konstıtýsıa jobasyna egde adamdarǵa qatysty qandaı mańyzdy normalar engenin aıtyp berdi.
«Jańa Konstıtýtsıa jobasynda árbir azamatqa jalaqy men zeınetaqynyń eń tómen mólsherine, jasyna, naýqastanýyna nemese múgedektigine baılanysty áleýmettik qamsyzdandyrýǵa tikeleı kepildik berilgen. Sonymen birge, memleket áleýmettik qamsyzdandyrýdyń jáne qaırymdylyqtyń túrli nysandaryn damytýǵa járdemdesý mindetin alyp otyr, bul egde jastaǵy adamdar úshin qosymsha qaýipsizdik beredi», – dedi Baqtyǵoja İzmuhambetov Konstıtýsıalyq komısıa X otyrysynda.
Konstýsıanyń jańa jobasynda Preambýlaǵa tarıhı-mádenı murany saqtaý men ulttyq mádenıetti qoldaý − memlekettik qyzmettiń negizgi qaǵıdalarynyń biri degen tujyrym engizildi. Osylaısha el bolashaǵyn qalyptastyrýda, eń aldymen jınaqtalǵan bilim, tájirıbe jáne tárbıeni urpaqqa jetkizý arqyly aǵa býynnyń aıryqsha róli moıyndalyp otyr.
«Burynǵy konsýltatıvtik qurylymdardyń ornyna «Qazaqstannyń Halyq Keńesi» qurylyp, quramyna barlyq óńirlerdiń ókilderi enedi. Bul da aǵa býynǵa mańyzdy memlekettik sheshimder men zańdardy talqylaýǵa qatysý múmkindigin beredi», – deıdi depýtat.
Aǵa býyn úshin mańyzdy tarmaq − kámeletke tolǵan eńbekke qabiletti balalardyń eńbekke jaramsyz ata-analaryna qamqorlyq jasaý mindetin Konstıtýsıada bekitý urpaqtar sabaqtastyǵy men otbasylyq yntymaqtastyqty kúsheıtedi.
Jańa Konstıtýsıa jobasy azamattardyń jeke qarajaty men ómirin qorǵaýdy da kúsheıtedi. Memleket bank salymdardyń, jınaqtardyń saqtalýyna jáne qarjylyq operasıalardyń qupıa bolýyna kepildik beredi.
«Onda jeke derekterdi alaıaqtardan jáne zańsyz paıdalanýdan, onyń ishinde ınternet-keńistikte qorǵaý jeke norma bolyp bekitiledi. Bul sıfrlyq tehnologıalardy paıdalana almaıtyn jáne memlekettik qyzmetterdi, medısınalyq kómekti alý nemese qarjylyq operasıa júrgizýde syn-qaterge jıi tap bolatyn egde adamdar úshin erekshe mańyzdy», – dep tolyqtyrdy Ardagerler uıymynyń tóraǵasy.
Sondaı-aq, el ardagerleri 3-bapta joǵary ekologıalyq mádenıetti qalyptastyrý jáne tabıǵatqa uqypty qaraý qaǵıdatynyń alǵash ret konstıtýsıalyq deńgeıde bekitilgenine de rıza.
Sóz sońynda Baqtyǵoja İzmuhambetov ardagerler qaýymy osy ázirlengen Konstıtýsıa jobasyn qoldaıtynyn jetkizdi.
