Saıasattanýshy Marat Shıbutov bolashaq birpalataly Parlament – Quryltaıdy taratý múmkindigi týraly konstıtýsıalyq normany neǵurlym egjeı-tegjeıli tujyrymdaýdy usyndy. Ol óz pikirin Konstıtýsıalyq reforma jónindegi komısıanyń onynshy otyrysynda bildirdi.
Marat Shıbutov Quryltaı birqatar joǵary laýazymdy tulǵalardy taǵaıyndaýdy kelisýge quqyly ekenin aıtty. Olardyń qatarynda Vıse-Prezıdent, Premer-Mınıstr, Konstıtýsıalyq Sottyń 10 sýdıasy, Ortalyq saılaý komısıasynyń 6 múshesi jáne Joǵary aýdıtorlyq palatanyń 8 múshesi bar. Iaǵnı, qazirgiden áldeqaıda kóp.
Marat Shıbutov Parlamentti taratý tetikterin neǵurlym ıkemdi jáne ymyraǵa kelýge múmkindik beretindeı etýdi usyndy.
«Taratady» degen sózdiń ornyna men úzildi-kesildilikti alyp tastap, kelisimge kelý múmkindigin qaldyryp, «taratýǵa quqyly» degendi qoldanýdy usynamyn. Bul «Prezıdent» bólimindegi 46-baptyń 2, 4, 8-tarmaqtaryna jáne «Quryltaı» bólimindegi 62-baptyń 1, 2-tarmaqtaryna qatysty. Osylaısha, biz saıası júıeni ıkemdi jáne ymyraǵa kelýge beıim etemiz. Qurmetti Komıssıa, meniń usynysymdy qoldaýdy suraımyn», – dedi ol.
Saıasattanýshy sondaı-aq QR jańa Konstıtýsıasyna usynylǵan árbir tujyrym Konstıtýsıalyq komısıada qyzý talqylaýdan ótip, ashyq qoǵamdyq baǵalaýmen súıemeldengenin atap ótti.
«Bul kúrdeli, keıde yńǵaısyz, biraq adal úderis boldy. Nátıjesinde, qazirgi kezeńde bizde túrli sala sarapshylarynyń birlesken eńbegi men ártúrli ustanym, tájirıbe men dúnıetanymynyń nátıjesi bolyp tabylatyn joba bar. Sondyqtan da Ata zań jobasy jalpyhalyqtyq daýys berýge shyǵarýǵa daıyn dep sanaımyn», – dep qorytyndylady Marat Shıbutov.
