Prezıdent Qasym-Jomart Toqaevtyń memlekettik sapary aıasynda Islamabadta ál-Farabı, Qanysh Sátpaev jáne Qoja Ahmet Iasaýı atyndaǵy mádenı-bilim berý ortalyqtarynyń, sondaı-aq «Dostyq» sport kesheniniń ashylý saltanaty ótti, - dep habarlaıdy alnews.
Ál-Farabı ortalyǵy ál-Farabı atyndaǵy Qazaq ulttyq ýnıversıteti men «Kaıd-ı-Azam» ýnıversıteti (Quaid-i-Azam University) arasyndaǵy yntymaqtastyq sheńberinde ashyldy. Ǵımarat oqý-ádistemelik jáne ǵylymı ádebıettermen, sonymen birge zamanaýı kompúterlik qural-jabdyqtarmen, jıhazben qamtylǵan. Ortalyq bazasynda qazaq tili kýrstary uıymdastyrylmaq.
Qanysh Sátpaev ortalyǵy Q. Sátpaev atyndaǵy Qazaq ulttyq tehnıkalyq zertteý ýnıversıteti (Satbayev University) men Pákistan ulttyq ǵylym jáne tehnologıa ýnıversıteti arasyndaǵy ǵylym, bilim berý, sondaı-aq tehnologıa salalaryndaǵy ekijaqty yntymaqtastyqty damytý jónindegi ýaǵdalastyqtarǵa sáıkes jumys isteıtin bolady.
Qoja Ahmet Iasaýı ortalyǵy Qoja Ahmet Iasaýı atyndaǵy Halyqaralyq qazaq-túrik ýnıversıteti men Islamabad Halyqaralyq ıslam ýnıversıtetiniń kelisimi boıynsha ashyldy.
«Dostyq» sport ortalyǵynda toǵyzqumalaq jáne qazaq kúresi boıynsha pákistandyq federasıalar qurý, Qazaqstan shahmat akademıasynyń, Qazaq batyry aralas jekpe-jeginiń fılıaldaryn ashý, sondaı-aq eki eldiń grepplıng pen boks federasıalary arasyndaǵy yntymaqtastyqty damytý kózdelip otyr. Qos memleket pákistandyq jattyqtyrýshylar men sportshylardy oqytý úshin birlesken oqý-jattyǵý jıyndaryn qolǵa almaq.
