Memleket basshysy óz sózinde osy mańyzdy is-sharany uıymdastyrýǵa bastamashy bolǵany úshin Premer-mınıstr Shahbaz Sharıfke alǵys aıtty, - dep habarlaıdy alnews.
– Pákistanǵa jasaǵan alǵashqy memlekettik saparym ekijaqty yntymaqtastyqtyń aıtýly tarıhı kezeńine aınaldy. Biz seriktestigimizdi strategıalyq deńgeıge kóterýge arnalǵan Birlesken deklarasıaǵa qol qoıdyq. Búgingi bıznes forým barysynda jalpy somasy 200 mıllıon dollarǵa jýyq 30-dan asa kelisim jasaldy. Bul baýyrlas halyqtarymyzdyń saýda-ekonomıkalyq jáne ınvestısıalyq yqpaldastyǵyn odan ári nyǵaıtýǵa tyń serpin beredi. Shyn máninde, seriktestigimiz udaıy keńeıip keledi. Byltyr eki el arasyndaǵy taýar aınalymy eki esege jýyq ósti. Qazaqstanda Pákistan kapıtalynyń úlesi bar 200-den astam kompanıa qurylys, aýyl sharýashylyǵy, taǵam ónerkásibi, ındýstrıa jáne basqa da kóptegen salada jumys isteıdi. Osy oń úrdiske arqa súıeı otyryp, ekijaqty saýda kólemin 1 mıllıard dollarǵa deıin ulǵaıtýdy kózdeıtin órshil maqsat qoıdyq, – dedi Qasym-Jomart Toqaev.
Prezıdent Úkimetke eki eldiń bıznes qurylymdary arasyndaǵy, sonyń ishinde Qazaqstan men Pákistan Úkimetaralyq komısıasy aıasyndaǵy yqpaldastyqty jandandyrýdy tapsyrǵanyn jetkizdi.
– Qazaqstan Ortalyq Azıadaǵy ekonomıkasy iri el retinde óńirlik ósimdi qamtamasyz etýge jáne tyń múmkindikterge jol ashýǵa úlken úles qosyp keledi. Byltyr ekonomıkamyz 6,5 paıyzǵa artyp, nátıjesinde ishki jalpy ónim kólemi 300 mıllıard dollar mejesinen asty. Al jan basyna shaqqanda ishki jalpy ónim kólemi 15 myń dollarǵa jetti. Bul bizdiń naryqtyń ornyqty jáne ekonomıkalyq áleýeti joǵary ekenin kórsetedi. Biz ınstıtýsıonaldyq qurylymdardy dáıekti túrde jetildirý arqyly órkendep kelemiz. Ekonomıkalyq strategıamyz saýda men ınvestısıany ártaraptandyrýǵa, ınovasıalardy yntalandyrýǵa jáne bilimge negizdelgen damý modelin ilgeriletýge baǵyttalǵan. Men jetekshilik etetin Sheteldik ınvestorlar keńesi Qazaqstandaǵy ashyqtyq, ádildik qaǵıdattaryna jáne iskerlik klımatty udaıy jaqsartýǵa beıil. «Bir tereze» qaǵıdatymen jumys isteıtin Ulttyq sıfrlyq ınvestısıalyq platforma ınvestorlar men bızneske arnalǵan úderisterdi aıtarlyqtaı jeńildetedi, – dedi Memleket basshysy.
Qasym-Jomart Toqaev Astana halyqaralyq qarjy ortalyǵy ınvestısıa, ınovasıa jáne korporatıvtik qyzmet kórsetý salalary boıynsha óńirdegi jetekshi ortalyq sanalatynyna toqtaldy.
– Búginde 100-ge jýyq elden 5 myńnan astam kompanıa osy platforma aıasynda tabysty jumys istep jatyr. Erekshe atap ótetin jaıt, ekojúıege Pákistannyń 11 kompanıasy qosylǵan. Qatysýshylar qatary aldaǵy ýaqytta da kóbeıedi dep senemiz. Qazaqstan, sondaı-aq óńir naryǵyna shyqqysy keletin pákistandyq kásipkerlerge senimdi ári ashyq múmkindikter usynamyz. Turaqty ınvestısıalyq qurylymdy udaıy jetildirip otyramyz, – dedi Prezıdent.
Memleket basshysynyń pikirinshe, Qazaqstan men Pákistannyń geografıalyq ornalasýy strategıalyq turǵydan mańyzdy. Eki el de óńirlik jáne jahandyq baılanystyń basty býyny bola alady.
– Eýrazıa júreginde ornalasqan Qazaqstan qurlyq arqyly saýda-sattyqta eleýli ról atqarady. Eýropa men Qytaı arasynda qurlyq joldarymen tasymaldanatyn júktiń 85 paıyzy biz arqyly ótedi. Qazirgi ýaqytta Transkaspıı halyqaralyq kólik baǵdaryn nemese Orta dálizdi damytý elimizdi transkontınentaldyq saýdanyń iri ortalyǵyna aınaldyratyn negizgi faktor retinde qarastyramyz. Sondaı-aq tranzıt aǵynyn anaǵurlym tıimdi úılestirýdi kózdeıtin Smart Cargo biryńǵaı sıfrlyq basqarý platformasyn ázirledik. Bul rette «Qazaqstan temir joly» ulttyq operatory, «Qazposhta» aksıonerlik qoǵamy men Pákistannyń ulttyq logıstıka korporasıasy jáne Pakistan Post kompanıasy arasynda kelisimge qol qoıylýyn quptaımyn. Olardan mýltımodaldy kólik sheshimderin ilgeriletýge jáne elderimizdiń port ınfraqurylymyn birlese paıdalanýǵa jol ashatyn naqty qadamdar kútemiz, – dedi Qasym-Jomart Toqaev.
Prezıdent Qazaqstan men Pákistan Azyq-túlik qaýipsizdigi jónindegi ıslam uıymyna múshe elder retinde musylman memleketterine arnalǵan ornyqty ári ádil azyq-túlik júıesin qurý jolynda ortaq maqsatqa jumylatynyn atap ótti.
– Álemniń 70-ten asa eline aýyl sharýashylyǵy ónimderiniń 200-den astam túrin eksporttaımyz. Sońǵy on jylda aýyl sharýashylyǵy óndirisiniń jalpy ishki kólemi 2,5 eseden asa kóbeıdi. 2030 jylǵa qaraı bul kórsetkishti eki ese arttyrýǵa nıettimiz. Joǵary sapaly jáne ekologıalyq taza aýyl sharýashylyǵy ónimin shyǵaratyn senimdi jetkizýshi retindegi pozısıamyzdy nyǵaıtyp kelemiz. Sol sebepti seriktestik baılanystardy keńeıtip, óńirlik ári jahandyq deńgeıde jańa jetkizý tizbegin qurý úshin júıeli qadamdar jasaımyz. Osy oraıda pákistandyq áriptesterimizdiń atalǵan sektordaǵy tájirıbesin bólisip, kapıtal quımaq nıetin quptaımyz. Jetisý oblysynda qant qyzylshasyn óńdeý zaýytyn iske qosý týraly Almoiz Group kompanıasymen jasalǵan kelisim – osy yntymaqtastyqtyń mańyzdy bastamasy, – dedi Memleket basshysy.
Qasym-Jomart Toqaev sıfrlandyrý elderimiz arasyndaǵy saýda jáne ınvestısıalyq yntymaqtastyq salalary boıynsha progrestiń negizgi faktoryna aınalady dep paıymdaıdy. Prezıdent Pákistan Úkimetiniń ozyq sıfrlyq sheshimder engizý jónindegi sharalaryna joǵary baǵa berdi.
– Premer-mınıstr Shahbaz Sharıf Pákistan ekonomıkasyn bolashaqta básekege qabiletti etý úshin sıfrlyq transformasıanyń mańyzdy ról atqaratynyn udaıy aıtyp keledi. Qazaqstan bul kóregen ustanymdy quptaıdy ári eki el úshin de sıfrlyq ınovasıalardyń áleýeti zor dep biledi. Biz aldaǵy birneshe jylda tolyq sıfrlyq elge aınalý jóninde órshil maqsat qoıdyq. Oǵan qol jetkizý úshin óńirdegi alǵashqy Jasandy ıntellekt jáne sıfrlyq damý mınıstrligin qurdyq. Inovasıanyń, zertteý men tehnologıalyq progrestiń jetekshi platformasy retinde qyzmet etetin Halyqaralyq Jasandy ıntellekt ortalyǵyn ashtyq. Alatau City keshendi quqyqtyq, sıfrlyq jáne qarjylyq ekojúıe qalyptastyrady. Bul elimizdegi qalalardy damytýda mańdaıaldy joba bolmaq. Sonymen qatar ekonomıkanyń ınovasıalyq jáne perspektıvti sektorlarynda ornyqty damytýdy yntalandyryp, qarjy tartady. Byltyr eki sýperkompúterdi iske qostyq. Bul aýqymdy derbes tildik modelderdi ázirleý jáne Qazaqstandaǵy tehnologıalyq progresti jedeldetý isinde mańyzdy qadamǵa aınaldy. Bizdiń kúsh-jigerimiz ulttyq, tipti jahandyq deńgeıdegi iri IT kompanıalardyń qurylýyna yqpal etti. Mysaly, qazaqstandyq InDrive platformasy Pákistanda keńinen paıdalanylady. Byltyrǵy kórsetkish boıynsha, qosymsha Pákistandaǵy taksı naryǵynyń 60 paıyzdan astamyn ıelengen. Osylaısha, qala ishindegi qozǵalysta birinshi orynǵa shyqqan. Pákistandyq seriktesterdi IT jáne ınvestısıa salalaryndaǵy múmkindikterimizdi paıdalanýǵa shaqyramyn, – dedi Prezıdent.
Qasym-Jomart Toqaev eki el arasyndaǵy seriktestik jańa kezeńge qadam basqanyn jáne ekonomıkada ekijaqty kún tártibiniń barlyq salasyn qamtıtyn baılanysty tereńdetýge mol múmkindik bar ekenin atap ótti.
Pákistan Premer-mınıstri eki eldiń saýda-ekonomıkalyq jáne ınvestısıalyq yqpaldastyǵyn tereńdetý turǵysynan búgingi bıznes forýmnyń mańyzdylyǵyna nazar aýdardy.
– Búgin biz taýar aınalymyn aldaǵy eki jylda 1 mıllıard dollarǵa jetkizý úshin barynsha áreket etýge ýaǵdalastyq. Osy maqsatqa tezirek jetý jolynda qolda bar múmkindiktiń bárin paıdalanýǵa kelistik. Bıyl dostas Qazaqstanǵa saparmen kelýge shaqyrǵany úshin qadirli baýyryma rızashylyǵymdy bildiremin. Bul shaqyrýdy zor qýanyshpen jáne erekshe yqylaspen qabyl aldym. Biz ózara jumys tobyn qurý jóninde sheshim qabyldadyq. Bul topqa ortaq saýda jáne ınvestısıalyq portfeldi keńeıtý jóninde besjyldyq baǵdarlamany ázirleý tapsyrylady, – dedi Shahbaz Sharıf.
Qazaqstan-Pákistan bıznes forýmynyń qorytyndysy boıynsha jalpy somasy 200 mıllıon dollarǵa jýyq 30-dan astam komersıalyq qujatqa qol qoıyldy. Kelisimderde eki eldiń qarjy, logıstıka, ónerkásip, energetıka, agroónerkásip kesheni, sıfrlandyrý jáne ınfraqurylym salalaryndaǵy yntymaqtastyǵyn keńeıtý kózdelgen.
