Qazaqstan Respýblıkasy Parlamenti Májilisiniń depýtaty, Qazaqstan Halyq partıasy fraksıasynyń jetekshisi Magerram Magerramov Konstıtýsıalyq reforma jónindegi komısıanyń 12-shi otyrysynda jańa Konstıtýsıa jobasynyń mańyzdylyǵy týraly aıtyp, qujattyń óńirlerde keńinen qoldaý tapqanyn jetkizdi.
Depýtat qujatta «Ádiletti Qazaqstan» qaǵıdatynyń aıqyndalǵanyn atap ótti.
«Qazaqstan Respýblıkasynyń jańa Konstıtýsıasynyń jobasy alǵash ret Preambýla men jalpy erejeler deńgeıinde memlekettik damýdyń irgeli baǵdary retinde «Ádiletti Qazaqstan» qundylyǵyn belgiledi. Ádiletti Qazaqstan qaǵıdaty Qazaqstan Halyq partıasy tolyq qoldaıtyn áleýmettik ádilettilikti bildiredi. Ádiletti Qazaqstan – «Zań men Tártip» qaǵıdatyn sózsiz ustanatyn el; teń múmkindikter eli, kepildendirilgen quqyqtar men bostandyqtar eli», – dedi depýtat.
Sondaı-aq, ol tarıhı sabaqtastyq pen ulttyq qundylyqtarǵa nazar aýdardy. Onyń aıtýynsha, jańa Konstıtýsıanyń Preambýlasynda qoǵamdyq beıbitshilik pen ornyqty damýdyń jalǵyz qolaıly negizi retinde etnosaralyq jáne konfesıaaralyq kelisimge aıtarlyqtaı kóńil bólingen. Onyń sózinshe, eńbek etýge quqyǵy týraly norma erekshe qoldaý tapty.
Instıtýsıonaldyq ózgerister týraly aıta kele, Magerramov memlekettik bıliktiń jańa qurylymy jaıynda sóz qozǵady. Birpalataly Parlamentti, «Halyq keńesi» joǵary konsýltatıvtik organyn qurý, sondaı-aq Konstıtýsıa jobasynyń túbegeıli jańalyqtary jańa baǵdar beredi. Depýtattyń aıtýynsha, qazir memleket tek prosesterdi basqarýǵa ǵana emes, azamattarǵa qyzmet etýge negizdelgen.
Magerramov jobanyń keńinen qoldaý tapqanyna toqtalyp, ony referendýmǵa shyǵarýdy usyndy.
«Men qazaqstandyqtardyń basym kópshiliginiń jańa Konstıtýsıa jobasyn tolyq qoldaıtynyn senimmen aıta alamyn. Muny tek Komısıanyń ǵana emes, sonymen qatar elimizdiń barlyq óńirlerindegi jańa Konstıtýsıa jobasyn ártúrli qoǵamdyq, áleýmettik toptarmen, qoǵamdyq uıymdarmen jáne eńbek ujymdarymen talqylaý aıasynda kezdesýlerdi ótkizgen Halyq partıasy fılıaldarynyń jumysyna baılanysty aıtyp otyrmyn»,– dedi ol.
Májilis depýtaty Qazaqstan Halyq partıasynyń fraksıasy tarapynan Parlament Májilisinde barlyq fılıaldarynyń, sarapshylardyń, ǵylymı jáne zań qoǵamdastyǵy ókilderiniń, kásipkerlerdiń, úkimettik emes uıymdardyń qatysýymen keńeıtilgen otyrys ótkizilgenin atap ótti. Otyrysqa 100-ge jýyq adam qatysyp, azamattar jańa Konstıtýsıa jobasyna biraýyzdan qoldaý bildirdi.
«Jańa Konstıtýsıanyń jobasy – ótken kezeń men búgingi basymdyqtardy túsine otyryp, Qazaqstannyń bolashaqtaǵy jańa baǵdary týraly sheshim qabyldaǵan halyqtyń birligi men birtutastyǵynyń belgisi dep aıtýǵa bolady. Joǵaryda aıtylǵandardy eskere otyryp, biz jańa Konstıtýsıanyń jobasyn jalpyhalyqtyq referendýmǵa shyǵarýdy usynamyz», – dep qorytyndylady sózin Magerram Magerramov.
