Konstıtýsıalyq reforma jónindegi komısıanyń 12-shi otyrysy barysynda Qazaqstan Respýblıkasy Konstıtýsıalyq Soty tóraǵasynyń orynbasary Baqyt Nurmuhanov kelip túsken usynystardyń qorytyndylary negizinde jańa Ata Zań jobasyna engizilgen qosymsha normalar týraly habarlady.
Onyń aıtýynsha, negizgi baǵyttardyń biri – turǵyn úıge qol suǵylmaýshylyq kepildigin kúsheıtý. Baqyt Nurmuhanov 28-baptyń 1-tarmaǵynda tek turǵyn úıden aıyrýǵa ǵana emes, sottyń sheshiminsiz odan shyǵarýǵa da jol bermeıtin tolyqtyrý kózdelgenin atap ótti. Turǵyn úıge basyp kirýge, ony qarap-tekserýge, tintýge zańda belgilengen jaǵdaıda jáne kózdelgen tártippen jol beriledi.
Taldaý qorytyndylary boıynsha jańa Konstıtýsıanyń kúshine ený jáne 1995 jylǵy Konstıtýsıanyń qoldanysyn toqtatý merzimderin reglamentteıtin normalar qosymsha kózdelgen. Jekelegen erejeler birpalataly Quryltaıǵa kóshý jáne onyń saılaýyn ótkizý máselelerin retteıtin bolady. Spıker normalardyń basqa bóligi laýazymdy tulǵalardy taǵaıyndaýǵa jáne jańa memlekettik organdardy qalyptastyrýǵa qatysty ekenin atap ótti.
«Konstıtýsıalyq Keńes pen Konstıtýsıalyq Sottyń buryn qabyldanǵan normatıvtik qaýlylary Ata zańǵa qaıshy kelmeıtin bóliginde zańdy kúshin saqtaıtynyn atap ótkim keledi», – dedi Baqyt Nurmuhanov.
Sońynda ol joba mátinderiniń pysyqtalǵany týraly habarlady. Spıkerdiń aıtýynsha, Konstıtýsıa jobasynyń memlekettik jáne orys tilderindegi mátinderi barynsha jetildirilgen.
«Olarda termınologıalyq jáne semantıkalyq birizdilik qamtamasyz etilgen. Quqyqtyq normalardyń tujyrymdamalary qoljetimdi jáne olardyń mazmuny barshaǵa túsinikti etip jazylǵan. Bul baǵytta zańgerler men lıngvıs mamandardan quralǵan jumys toptarynyń úlken jumysyn erekshe atap ótkim keledi. Jańa Konstıtýsıanyń pysyqtalǵan jobasy Komısıa men jumys toptarynyń otyrystarynda jan-jaqty talqylanyp, qoldaý tapty. Komısıa músheleriniń azamattarmen jáne zań qoǵamdastyǵy ókilderimen ótkizgen kezdesýlerinde de oń pikirler aıtyldy», - dep qorytyndylady Baqyt Nurmuhanov.
