Jańa Konstıtýsıa jobasy – sarapshylar men qoǵam ókilderiniń uzaq ári tıanaqty eńbeginiń nátıjesinde ázirlengen biregeı tarıhı qujat. Ol jalpyhalyqtyq referendýmǵa shyǵarýǵa tolyq daıyn. Bul týraly Májilis depýtaty Aıdos Sarym Konstıtýsıalyq reforma jónindegi komısıanyń 12-shi otyrysynda málimdedi.
Aıdos Sarymnyń aıtýynsha, jańa Konstıtýsıany daıyndaý barysynda birqatar mańyzdy serpindi qadamdar jasaldy.
«Birlese jáne úılesimdi atqarylǵan jumystyń arqasynda qajetti quqyqtyq normalar men tujyrymdardy taba aldyq. Olar jýyrda azamattarymyzdyń ómirin oń baǵytta ózgertip, memleketimiz ben qoǵamymyzdyń jańa kelbetin qalyptastyrýǵa yqpal etedi», – dedi depýtat.
Onyń sózinshe, jańa Ata zańnyń jobasy Qazaqstannyń tarıhı damý jolyn jan-jaqty eskerip, memlekettiliktiń sabaqtastyǵyn aıqyndaıdy.
«Tarıhshy ári muraǵatshy retinde mundaı ustanym men úshin aıryqsha qundy. Biz jańa taǵdyrdyń, ortaq bolashaqtyń Konstıtýsıasyn jasadyq dep shynaıy senimmen aıta alamyn», – dedi Aıdos Sarym.
Sondaı-aq, ol qujatta ulttyq qaýipsizdik, el birligi men qoǵamdyq kelisimdi saqtaý, Qazaqstan shekarasynyń myzǵymastyǵyn qamtamasyz etý máseleleri tolyq qamtylǵanyn atap ótti.
Budan bólek, Qazaqstan óz Konstıtýsıasynda alǵash ret ǵylym, bilim, mádenıet jáne ınovasıa salalarynyń basymdyǵyn aıqyndap otyr.
«Biz álemdegi alǵashqy memleketterdiń biri bolyp azamattardyń sıfrlyq quqyqtaryn Ata zań deńgeıinde bekitip otyrmyz. Dál osy salalarda memleketter arasyndaǵy basty básekelestik júredi. Biz ashyq, adal ári órkenıetti básekege daıynbyz», – dedi depýtat.
Sonymen qatar, onyń aıtýynsha, Konstıtýsıa jobasynda «Zań men Tártip» qaǵıdattary ulttyq basymdyq retinde aıqyndalyp, qazaqstandyqtardyń el tabıǵatynyń taǵdyryna ortaq ekologıalyq jaýapkershiligi bekitilgen.
«Bizdiń Konstıtýsıa jobamyz – bul erkindik, tártip, zańdylyq jáne ózara jaýapkershilik Konstıtýsıasy», – dedi Aıdos Sarym.
Sóz sońynda ol jańa Konstıtýsıany ázirleý barysynda aýqymdy ári muqıat jumys júrgizilgenin atap ótti.
«Qazirgi nusqada ony Prezıdentke usynyp, jalpyhalyqtyq referendýmǵa shyǵarýǵa ábden bolady dep senemin. Biz respýblıkalyq shtab quryp, elimizdiń barlyq óńirine baryp, árbir azamatpen ashyq ári senimdi dıalog júrgizýge daıynbyz», – dep túıindedi depýtat.
