Almatyda Parlament depýtattarynyń, qoǵamdyq uıymdar ókilderiniń, áleýmettik sala, bilim berý qyzmetkerleri men jastardyń qatysýymen kezdesýler serıasy jalǵasýda. Dıalog alańdary barysynda el damýynyń negizgi baǵyttary, áleýmettik saıasat, bilim berý men densaýlyq saqtaý máseleleri, sondaı-aq memlekettik júıeni odan ári jetildirýge baǵyttalǵan bastamalar talqylanýda.
Talqylaý alańdarynyń biri Balalarǵa jedel medısınalyq kómek kórsetý ortalyǵynda ótti. Munda QR Parlamenti Senatynyń depýtattary «Ádiletti jáne Progresıvti Qazaqstannyń Halyqtyq Konstıtýsıasy úshin!» jalpyulttyq koalısıasynyń jáne AMANAT partıasynyń ókilderimen birge mekeme ujymymen kezdesti. Qatysýshylar áleýmettik saıasat pen densaýlyq saqtaý júıesin damytý máselelerin talqylady.
Senator Sultanbek Makejanov búdjettiń áleýmettik baǵyttylyǵy memlekettik saıasattyń negizgi basymdyqtarynyń biri bolyp qala beretinin atap ótti. Onyń aıtýynsha, qarajattyń edáýir bóligi densaýlyq saqtaý, bilim berý jáne áleýmettik salany damytýǵa baǵyttalady. Sondaı-aq ol 2025 jyldyń qorytyndysy boıynsha Almatyda alǵashqy medısınalyq-sanıtarlyq kómek kórsetetin eki ortalyq pen jańa emhana paıdalanýǵa berilgenin, jedel medısınalyq járdem qyzmetiniń avtoparki tolyq jańartylǵanyn, al densaýlyq saqtaý salasyn qarjylandyrý 25%-ǵa óskenin jetkizdi.
Senat depýtaty Nurıa Nıazova qoǵamdyq qatysý ınstıtýttarynyń mańyzdylyǵyna toqtalyp, memleket pen qoǵam arasyndaǵy ózara is-qımyl tetikteriniń biri retinde Halyq keńesiniń qurylýyn atap ótti.
Konstıtýsıalyq ózgeristerge qatysty máseleler qalalyq Bilim berýdegi jańa tehnologıalardyń ǵylymı-ádistemelik ortalyǵy ujymymen ótken kezdesýde de talqylandy. Senatorlar Konstıtýsıa jobasynyń negizgi jańashyldyqtary týraly aıtyp, olardyń qatarynda otbasy ınstıtýtyn damytý jáne bilim berý salasyn qoldaý máseleleri bar ekenin atap ótti.
Nýrıa Nıazovanyń aıtýynsha, Negizgi zań jobasynda otbasynyń róli men ata-analardyń bala tárbıesine jaýapkershiligine erekshe nazar aýdarylǵan, sondaı-aq otbasy er men áıeldiń odaǵy retinde belgilengen. Senator Janna Asanova qujatta azamattardyń negizgi quqyqtary men bostandyqtary, sonyń ishinde bilim berý salasyna qatysty normalar kórinis tapqanyn atap ótti. Kezdesý barysynda depýtattar qatysýshylardyń Konstıtýsıa jobasyna engizilgen jańa ınstıtýttarǵa, onyń ishinde bir palataly Parlament pen Halyq keńesi ınstıtýtyna qatysty suraqtaryna jaýap berdi.
Jańa Konstıtýsıa jobasy «Shapaǵat» áleýmettik qyzmetter kórsetý ortalyǵynda da talqylandy. Munda jalpyulttyq koalısıa músheleri usynylyp otyrǵan ózgeristerdiń saıası júıeni jańǵyrtýǵa jáne azamattardyń quqyqtary men bostandyqtarynyń kepildikterin nyǵaıtýǵa yqpaly týraly aıtyp berdi. Memlekettik basqarýdyń ashyqtyǵyn arttyrý jáne qoǵam men bılik arasyndaǵy ózara is-qımyldy keńeıtý máselelerine erekshe nazar aýdaryldy.
Sultanbek Makejanov Konstıtýsıany jańǵyrtý qazirgi zaman talaptary men qoǵamnyń damý suranysyna baılanysty ekenin atap ótti. Onyń aıtýynsha, Konstıtýsıa jobasyn ázirleý jónindegi jumys tobyna azamattardan 10 myńnan astam usynys túsken, bul qoǵamnyń joǵary belsendiligin kórsetedi.
Janna Asanova jańa Konstıtýsıa árbir azamattyń múddesin eskeretin jáne qoǵamdyq kelisimdi nyǵaıtýǵa yqpal etetin qujat bolýy tıis ekenin atap ótti. Ol negizgi baǵyttardyń qatarynda zań ústemdigin qamtamasyz etý jáne sot júıesiniń táýelsizdigin odan ári nyǵaıtýdy atady. Talqylaý barysynda ortalyq qyzmetkerleri áleýmettik salany damytý máselelerin kóterdi.
Eske salaıyq, Memleket basshysynyń Jarlyǵyna sáıkes jańa Konstıtýsıany qabyldaý jónindegi respýblıkalyq referendým 15 naýryzǵa josparlanǵan.
