Almatyda jańa Konstıtýsıa jobasy men referendým ótkizý máseleleri boıynsha jarıa talqylaýlar jalǵasýda, - dep habarlaıdy alnews.
«Ádiletti jáne Progresıvti Qazaqstannyń Halyq Konstıtýsıasy úshin!» Jalpyulttyq koalısıasynyń músheleri Qazaq ulttyq agrarlyq zertteý ýnıversıtetiniń profesor-oqytýshylar quramy men stýdentterimen kezdesti.
İs-sharanyń maqsaty – jańa Konstıtýsıa jobasynyń mazmunyn túsindirý, sondaı-aq konstıtýsıalyq reformalardyń mánin talqylaý boldy.
Parlament Senatynyń depýtattary reformalardyń memlekettik basqarý júıesin jetildirýge, zań ústemdigin nyǵaıtýǵa, azamattardyń quqyqtary men qaýipsizdigin qorǵaýdy kúsheıtýge baǵyttalǵanyn atap ótti.
– Qazaqstan Halyq Keńesin – búkil halyqtyń múddesin bildiretin joǵary konsýltatıvtik organdy qurý qoǵamdyq dıalogty ınstıtýsıonaldandyrý jolyndaǵy mańyzdy qadam bolyp tabylady. Halyq keńesi zań shyǵarý bastamasy quqyǵyna ıe bola otyryp, ishki saıasat boıynsha usynystar ázirleý, qoǵamdyq kelisimdi nyǵaıtý jáne jalpyulttyq qundylyqtardy ilgeriletý alańyna aınalady, – dep atap ótti senator Nýrıa Nıazova.
Kezdesý barysynda agrarlyq ǵylymdy damytý, agroónerkásiptik keshenge ınovasıalyq tehnologıalardy engizý, ǵylymı nátıjelerdi óndiriske tıimdi transfertteý jáne básekege qabiletti kadrlar daıarlaý máseleleri de qarastyryldy.
Sonymen qatar Qazaq ulttyq ýnıversıtetinde Parlament Senaty depýtattarynyń ýnıversıtet stýdentteri men oqytýshylarymen kezdesýi ótti. Kezdesýdiń basty taqyryby – jańa Konstıtýsıa jobasyn túsindirý boldy.
Kezdesýge qatysýshylar memlekettik ınstıtýttardyń tıimdiligi men jańa saıası mádenıetti qalyptastyrý máselelerin talqylap, jastardyń el taǵdyryna sanaly túrde qatysýynyń mańyzdylyǵyn atap ótti.
Senat depýtaty Darhan Qydyráli jahandyq básekelestik jaǵdaıynda eldiń jedel damýy qajettigine erekshe nazar aýdardy.
– Tek ınersıamen ósip kelgen kezeń artta qaldy. Búginde qysqa ýaqytqa bolsa da artta qalý eleýli shyǵyndarǵa alyp kelýi múmkin, – dedi senator.
Ol sondaı-aq ǵylym, bilim jáne tehnologıalyq damý basymdyqtary Konstıtýsıa jobasynda kórinis tapqanyn atap ótti.
QazUÝ profesory, zań ǵylymdarynyń doktory Erkin Dúısenov usynylyp otyrǵan túzetýlerdiń aýqymy is júzinde jańa Negizgi zańdy qabyldaýdy bildiretinin aıtty.
– Búginde jańa Konstıtýsıa jobasyna 84 % ózgeris engizildi. Bul endi jańa Konstıtýsıa týraly sóz bolyp otyrǵanyn bildiredi, – dedi ol.
Eske sala keteıik, Memleket basshysynyń Jarlyǵyna sáıkes 15 naýryzda Qazaqstan Respýblıkasynyń jańa Konstıtýsıasyn qabyldaý boıynsha respýblıkalyq referendým ótkizý josparlanǵan.
