Ońtústik Koreıa prezıdenti Iýn Sok Iýennyń elde áskerı jaǵdaı jarıalaýyna baılanysty Parlament oǵan ımpıdjment jarıalaǵan bolatyn. Prezıdent Iýn óz áreketin eldiń demokratıasyn qaýipten qutqarý úshin jasalǵan oryndy áreket dep sanaıdy. Alaıda onyń keltirgen ýájine anyq dálel joq.
Al juma kúni eldiń Sybaılas jemqorlyqqa qarsy kúres qyzmeti prezıdentti tutqyndaýǵa order alyp rezıdensıasyna barǵanymen maqsattaryna qol jetkize almady. Prezıdenttiń kúzet qyzmeti olardy rezıdensıaǵa kirgizbeı qoıǵan. Sońynda Iýn Sok Iýeni kóteriliske shyqty degen aıyppen qamaýǵa alý júzege aspaı qaldy.
«Prezıdenttiń jeke qaýipsizdik komandasymen uzaqqa sozylǵan kıkiljińge baılanysty biz qamaýǵa alý týraly buıryqty oryndaý múmkin emes dep sanaımyz», - dedi tergeýshiler málimdemesinde.
Kóptegen sarapshylar Iýnnyń jaýap berýden bas tartý áreketi saıası daǵdarysty tereńdetip, eldegi turaqsyzdyqty kúsheıtedi dep sanaıdy. Qazirshe ony qolǵa alý áreketi qaıta jalǵasa ma, joq pa degen suraqta jaýapsyz kúıde tur.
Tutqyndaýǵa barǵandar prezıdenttiń jeke kúzet qyzmetimen qaqtyǵysqa túsken degen de málimetter tarady. Al prezıdent saraıynyń mańynda Iýnnyń jaqtastary ereýildetip, oǵan qoldaý bildirdi. Prezıdent Iýn olarǵa qarata málimdeme jasap, alǵysyn da bildirgen, ári óziniń Koreıanyń demokratıasyn qorǵap qalý úshin sońyna deıin kúresetinin jektizgen. Sońǵy kúnderi onyń myńdaǵan jaqtastary sheneýnikterdiń ony tutqyndaýyna jol bermeıtindein bildirip, rezıdensıa mańyna lager de qurǵan. Tártipti saqtaý úshin jaqyn mańda kóp polısıa qyzmetkerleri jumyldyryldy.
Parlament prezıdent Iýnǵa ótken aıda ımpıchment jarıalady. Ol tergeýshilerdiń jaýap alý úshin shaqyrtýlaryn birneshe ret keri qaıtardy. Ári áskerı jaǵdaı jasaý prezıdentke berilgen zańdy ókilettilik ekenin alǵa tartqan. Aıta keteıik, bundaı jaǵdaı elde 45 jylda alǵash ret oryn alyp otyr.
Qamaýǵa alý týraly buıryq seısenbi kúni shyǵarylǵan. Sot orderin joǵary laýazymdy basshylardyń qatysýymen qylmystyq isterdi qaraıtyn táýelsiz memlekettik mekeme Sybaılas jemqorlyqty tergeý basqarmasy alǵan. Eger sheneýnikter Iýndy tutqyndaýdy jalǵastyrǵysy kelse 48 saǵat ishinde sotqa taǵy da qamaýǵa alý orderin shyǵarýǵa júgine alady.
