Qazaqtyń bir týar perzenti, myń jyldyqtyń amanatyn arqalap, ultynyń ulan-qaıyr tarıhyn túgendegen jazýshy Muhtar Muqanuly Maǵaýın ómirden ótti. 10 qańtardyń tańynda 85 jasqa qaraǵan shaǵynda AQSH-tyń Merılend shtatynda óz úıinde aqtyq demin taýysty.
Uly qalamgerdiń qazasyna kúlli jurty qaıǵyryp, aza bildirip jatqany málim. Memleket basshysy Qasym-Jomart Toqaev ta marqumnyń otbasyna, týǵan-týystaryna kóńil aıtý jedel hatyn joldady.
Muhtar Muqanuly Maǵaýın 1940 jyly 29 qańtarda sol kezdegi Semeı oblysy Shubartaý aýdanynda týǵan. 1962 jyly Qazaq Memlekettik Ýnıversıtetiniń Fılologıa fakúltetin, 1965 jyly aspırantýrasyn tamamdaǵan. "Qazaq ádebıeti" gazetiniń bólim meńgerýshisi, "Jazýshy" baspasynda bas redaktordyń orynbasary, Qazaq KSR Ǵylym akademıasynyń M.Áýezov atyndaǵy ádebıet jáne óner ınstıtýtynda aǵa ǵylymı qyzmetker bolyp qyzmet atqarǵan. Máskeýde M.Gorkı atyndaǵy Ádebıet ınstıtýtynd Qazaq Folklory men qazaq ádebıeti tarıy boıynsha arnay leksıalyq kýrstra júrgizgen. 1984-1986 jyldary "Jazýshy" baspasynyń bas redaktory, 1988-2006 jyldar arasynda "Juldyz" jýrnalynyń bas redaktory boldy. "Alasapran" tarıhı roman-dılogıasy úshin Qazaq KSR-nyń Abaı atyndaǵy Memlekettik syılyǵy berildi.
M.Maǵaýın baspasóz betinde 1959 jyldan bastap tanyla bastady. 60-jyldar ishinede ol ádebıet zertteýshisi retinde áıgili boldy. "Qazaqstannyń halyq jazýshysy" ataǵynyń (1984), Túrkıanyń halyqaralyq "Túrik dúnıesine qyzmet" syılyǵynyń (1997) ıegeri, "Tarlan" syılyǵynyń laýreaty (2002), Qazaqstannyń qurmetti jazýshysy ataǵy berilgen (2019).
2006 jyldyń sońynda Cheh Respýblıkasyna qonys aýdaryp, keıinnen AQSH jáne Túrkıa elderinde turdy. Osy kezeńderde súbeli tarıhı eńbekterin – "Shyǵysqan jáne onyń zamany", "Altynorda" shyǵarmalaryn ómirge ákeldi. Qazaqtyń myń jyldyq tarıhyn túgendeý jolynda kúsh-jigerin saryqa jumsady.
Ujymymyz atynan kúlli Qazaq halqyna, otandastarǵa qaıǵyra kóńil aıtamyz! Marqumnyń jany jánnatta, rýhy beıishte shalqysyn!
