Qazaqstan Respýblıkasynyń Prezıdenti Qasym-Jomart Toqaevtyń tóraǵalyǵymen ótken Úkimettiń keńeıtilgen otyrysynda Premer-mınıstr Oljas Bektenov ekonomıkanyń turaqty damýyn qamtamasyz etý boıynsha júrgizilip jatqan jumystar týraly baıandady, - dep habarlaıdy alnews.
Oljas Bektenov Memleket basshysynyń el ekonomıkasyn odan ári nyǵaıtý jónindegi alǵa qoıǵan mindetterine, Qazaqstan halqyna Joldaýynda belgilengen strategıalyq maqsattarǵa sáıkes Úkimet 2025 jyly júıeli ózgeristerge baǵyttalǵan is-sharalar qabyldaǵanyn atap ótti.
Salyq, tarıf jáne búdjet saıasatynda, sıfrlyq jáne qurylys sektorlarynda, sondaı-aq áleýmettik salada qabyldanǵan sheshimder ekonomıkany damytýǵa tosqaýyl bolyp otyrǵan qurylymdyq dısproporsıalardy joıýǵa baǵyttaldy.
Salyq jáne búdjet reformasy Ulttyq qordan nysanaly transfertterdi almaı-aq, elimizdiń úsh jyldyq búdjetin qalyptastyrýǵa múmkindik berdi. Ol 2028-shi jylǵa qaraı búdjet tapshylyǵyn jalpy ishki ónimniń 0,9%-na deıin qysqartýǵa yqpal etedi. Jergilikti búdjetterdiń respýblıkalyq búdjetke táýeldiligi 2025-shi jylǵy 50%-dan 2028 jyly 34%-ǵa deıin tómendeıdi, — dedi Oljas Bektenov.
Júzege asyrylǵan reformalar kezeńinde 2025 jyldyń qorytyndysy boıynsha ekonomıkanyń ornyqty ósimin saqtap qalýǵa qol jetkizildi. Qundyq mánde JİÓ-niń ósýi $20,1 mlrd-ty qurady.
Jalpy, 2025 jyly JİÓ ósimi 6,5% qurady. Ekonomıkalyq ósimdi negizgi salalardyń jedel damýy qamtamasyz etti: Onyń ishinde kólik – 17,8%-ǵa, qurylys – 14,6%-ǵa, taý-ken ónerkásibi – 17,4%-ǵa, óńdeý ónerkásibi – 12,2%-ǵa, saýda – 26%-ǵa jáne aýyl sharýashylyǵy – 5,9%-ǵa ósti.
