Azamattar, qoǵamdyq uıymdar, ǵalymdar men zańgerler qaýymdastyǵynyń birqatar usynysy negizinde Qazaqstanyń jańa Konstıtýsıasynyń jobasyna jańa mańyzdy tolyqtyrýlar engizildi. Olardy Konstıtýsıalyq reforma jónindegi komısıanyń onynshy otyrysynda Konstıtýsıalyq Sot tóraǵasynyń orynbasary Baqyt Nurmuhanov tanystyrdy.
Ol Komısıaǵa volonterlik qyzmetti konstıtýsıalyq deńgeıde bekitý týraly usynystar túskenin habarlady. Nátıjesinde, qoldanystaǵy «Volonterlik qyzmet týraly» Zańdy jáne qoǵamnyń damýy men qorshaǵan ortany qorǵaýdaǵy volonterliktiń mańyzdylyǵyn eskere otyryp, olar qoldaý tapqanyn málimdedi.
«31-baptyń 2-tarmaǵynda Qazaqstan Respýblıkasynda erikti áleýmettik saqtandyrý, áleýmettik qamsyzdandyrýdyń ózge de nysandaryn qurý, volonterlik qyzmet jáne qaıyrymdylyqtyń yntalandyrylatyny jóninde tolyqtyrý engizildi», – dedi Konstıtýsıalyq sot tóraǵasynyń orynbasary.
Ol bul ıdeıany iske asyrý jańa Konstıtýsıa jobasynyń basqa erejelerin úılesimdi túrde tolyqtyratynyn málimdedi. Atap aıtqanda, Preambýla men Qazaqstan Respýblıkasynyń túbegeıli qaǵıdattaryn, onyń ishinde jaýapty jáne jasampaz patrıotızm ıdeıalaryn ilgeriletý, eńbekqorlyq qundylyqtaryn bekitý jáne t.b.
Baqyt Nurmuhanov basqa da ózgerister Quryltaıdyń qyzmetin uıymdastyrýmen baılanysty ekenin aıtty.
Máselen, komıtetter men komısıalardyń qurylý tártibi, ókilettikteri, qyzmetin uıymdastyrýdy zańmen aıqyndaıtyn jobanyń 59-babynyń 3-tarmaǵyn alyp tastaýdy usyndy.
Ol qazirgi ýaqytta joǵary ókildi organnyń komıtetteri men komısıalarynyń qyzmeti máseleleri «Qazaqstan Respýblıkasynyń Parlamenti jáne onyń depýtattarynyń mártebesi týraly» Konstıtýsıalyq zańmen, «QR Parlamentiniń komıtetteri men komısıalary týraly» Zańmen, Parlament pen onyń palatalarynyń reglamentterimen retteletinin eske saldy.
«Bul túzetý atalǵan Konstıtýsıalyq zańda osy máselelerdi qamtýǵa jáne olardy quqyqtyq retteý deńgeıin arttyrýǵa múmkindik beredi», – dep atap ótti Baqyt Nurmuhanov.
Ol sondaı-aq Konstıtýsıa jobasynyń memlekettik jáne orys tilderindegi mátinderin jetildirý jumystary jalǵasyp jatqanyn habarlady.
Baqyt Nurmuhanovtyń aıtýynsha, jumys toby quqyqtyq normalar mazmunynyń qoljetimdiligi men túsiniktiligin qamtamasyz etý úshin tujyrymdardy ońtaılandyrý boıynsha sharalar qabyldaýda. Bul rette jobalardyń termınologıalyq jáne semantıkalyq biryńǵaılyǵyn qamtamasyz etýge erekshe nazar aýdarylýda.
Atap aıtqanda, Úkimet, Parlament, Prezıdent Ákimshiligi, Konstıtýsıalyq komısıanyń redaksıalyq-termınologıalyq jumys toby, «Qazaq tili» Halyqaralyq qoǵamy mamandary men jumysqa tartylǵan lıngvıserdiń usynystary negizinde jekelegen redaksıalyq jáne stılısıkalyq túzetýler júzege asyryldy.
