2026 jylǵy 9 aqpanda Astana qalasynda Ulttyq volonterlik jeli «Jańa Konstıtýsıa jobasyn talqylaý jáne qoldaý» taqyrybynda dóńgelek ústel ótkizdi. İs-sharaǵa elimizdiń barlyq óńirlerinen volonterlik uıymdardyń ókilderi, óńirlik volonterlik front-ofıster men bastamashyl toptar, sondaı-aq seriktester oflaın jáne onlaın formatta qatysty.
Kezdesý barysynda volonterlik sektordyń jańa Konstıtýsıany talqylaýǵa qatysýy, úkimettik emes uıymdardyń halyqty aqparattandyrýdaǵy róli, qoǵamdyq dıalogty damytý jáne memlekettik organdarmen ózara is-qımyl máseleleri talqylandy.
Qazaqstan Respýblıkasy Parlamenti Májilisiniń depýtaty, Konstıtýsıalyq reforma jónindegi komısıa múshesi, «Ulttyq volonterlik jeli» ZTB tóraǵasy Kım Vera Aleksandrovna Konstıtýsıa jobasyn ázirleýge azamattyq qoǵamnyń qatysýynyń mańyzyn jáne Konstıtýsıalyq komısıa jumysynyń ashyqtyǵyn atap ótti.
«Konstıtýsıa qoǵammen dıalog negizinde qalyptasýda, jabyq rejımde emes. Jańa Konstıtýsıa jobasymen alty aı jumys isteý barysynda azamattardan, qoǵamdyq uıymdardan, saıası partıalardan jáne sarapshylardan shamamen 4 myń usynys tústi. Bul qoǵamnyń endi pasıvti baqylaýshy emes, saıası úderisterdiń tolyqqandy qatysýshysyna aınalyp kele jatqanyn bildiredi», — dedi Vera Kım.
Onyń aıtýynsha, jańa konstıtýsıalyq ınstıtýt — Halyq keńesin engizý qoǵamdyq qatysýdy nyǵaıtýdaǵy mańyzdy qadam bolmaq. «Bul memleket pen qoǵam strategıalyq damý baǵyttaryn birlesip talqylaıtyn modelge kóshý. Qoǵam tek talqylaý quqyǵyna ǵana emes, zań shyǵarý úderisine resmı túrde bastamalar engizý múmkindigine ıe bolady», — dep atap ótti ol.
Konstıtýsıalyq reforma jónindegi komısıa múshesi, «Assambleıa jastary» RQB tóraǵasy Djýmýrbaev Tımýr Gabdýlovıch jańa Konstıtýsıanyń Qazaqstan jastary úshin erekshe mańyzyn atap ótti.
«Qazaqstan jastary úshin jańa Konstıtýsıany qabyldaý — asa mańyzdy qadam. Óıtkeni onyń mańyzy búgingi jáne bolashaq urpaqqa tikeleı baǵyttalǵan. Adamǵa baǵdarlaný — jastardyń ádil ári qoljetimdi ósý jáne damý múmkindikterin ashatyn jańa Negizgi zańnyń basty logıkasy», — dedi Tımýr Djýmýrbaev.
Ol sondaı-aq syndarly patrıotızm, adamı kapıtaldy damytý, bilim men ınovasıa qaǵıdattaryn bekitý jastardyń ózin-ózi júzege asyrý múmkindikterin keńeıtip, el damýyndaǵy rólin kúsheıtetinin atap ótti.
Óz kezeginde «Medısınalyq jastar» RQB tóraǵasy, medısına salasynyń volonteri Ábdirash Abylaıhan Ábdikerimuly Konstıtýsıa jobasynyń áleýmettik jáne medısınalyq aspektilerine toqtaldy.
«Usynylyp otyrǵan Konstıtýsıa jobasy adam ómiri men densaýlyǵyn memlekettik saıasattyń ózegine qoıady. Otbasyny, ana men balany qorǵaý, sondaı-aq densaýlyq saqtaý quqyǵyn bekitý densaýlyq saqtaý júıesin damytý men qoǵamdyq densaýlyqty nyǵaıtýdyń berik quqyqtyq negizin qalyptastyrady», — dedi Abylaıhan Ábdirash.
Onyń aıtýynsha, medısınalyq jastar bul jobany adamǵa baǵdarlanǵan, áleýmettik jaýapty memleket qalyptastyrý jolyndaǵy mańyzdy qadam retinde baǵalaıdy.
«Jobanyń tıimdiligi onyń is júzinde qalaı júzege asatynyna tikeleı baılanysty. Biz bul normalar naqty baǵdarlamalarmen, jetkilikti qarjylandyrýmen jáne jas mamandar úshin qolaıly eńbek jaǵdaılarymen qamtamasyz etiledi dep úmittenemiz», — dep qosty ol.
Dóńgelek ústel ashyq talqylaý jáne erkin pikir almasý formatynda ótti. Shara qorytyndysynda Ulttyq volonterlik jeli jańa Konstıtýsıa jobasyn qoldaý jónindegi úndeýdi jarıalady
