Járken Bódeshulynyń esimi Qazaq poezıasynda altyn áriptermen tańbalanǵany daýsyz. Dańyqty aqyn aramyzda bolsa bıyl 80 jasqa tolar edi. Búgin, 28 qazan Almatyda Járken Bódeshulyn eske alýǵa arnalǵan birqatar sharalar ótpek. Eske alý sharalary aqynǵa arnalǵan eskertkish taqta qoıýdan bastaldy.
Almatydaǵy «Qulager» yqsham aýdanynda Járken Bódeshuly turǵan úıge arnaıy eskertkish taqta ornatyldy. Eske alý sharasyna Qazaqstan Jazýshylar odaǵynyń basqarma tóraǵasy Mereke Qulkenov, belgili ǵalym Álimǵazy Dáýlethan, aqyn Qasymhan Begmanov bastaǵan qalamgerler men zıaly qaýym ókilderi qatysty.
Qazaq poezıasynda aty aıryqsha atalatyn Járken Bódeshulyn ádebı orta «Járken jyraý» dep te atasady. Onyń týǵan jer taqyrybyndaǵy saǵynyshqa toly sar qaımaq jyrlary oqyrmanǵa keńinen tanymal. Tipti búginde aqynnyń keıbir ólek tarmaqtary jurt aýzynda turaqty sóz tirkesine aınalyp ketti dese de bolady.
Aıtalyq «Juldyzǵa ornyn Aı bermes, qansha jaryq bolsa da» deıtin, nemese «Qara jer qunarlylyǵy úshin satyldy, Maǵjan satylmaǵany úshin atyldy, men jer emespin satylyp ketetin, Maǵjan emespin atylyp ketetin» deıtin óleń joldary ózgermes aksıomaǵa aınalǵandaı.
Búgin tústen keıin 16:00-de Almatydaǵy «Alataý» dástúrli óner teatrynda Járken Bódeshulyn eske alýǵa arnalǵan arnaıy ádebı-sazdy kesh ótetinin oqyrmandarymyzǵa habarlaı keteıik.
The Alnews
