Almatyda qala ǵımarattaryna jazylǵan esirtki jarnamalaryn joıýǵa baǵyttalǵan «Narkostop» aksıasy ótti, - dep habarlaıdy alnews.
Shara Almaty qalasy Jastar saıasaty basqarmasy, prokýratýra jáne Almaty qalasynyń Polısıa departamentiniń Esirtki qylmysyna qarsy is-qımyl basqarmasynyń qoldaýymen ótti.
Atalǵan is-sharanyń maqsaty – jastarǵa esirtkiniń zıandylyǵyn túsindire otyryp, salaýatty ómirdi tańdaýǵa shaqyrý.
«Narkostop» aksıasy — bul tek jazýlardy boıaý emes, jastarǵa qaýipsiz bolashaq syılaýǵa baǵyttalǵan mańyzdy qadam. Osyndaı sharalar arqyly jastar arasynda esirtkiniń zıandylyǵyn túsindirip, salaýatty ómir saltyn nasıhattap, olardyń óz ortasyna degen jaýapkershiligin arttyrǵymyz keledi», - dedi uıymdastyrýshylar.
Aksıaǵa 200-ge jýyq volonterler jáne belsendi jastar qatysty. Olar Almaty qalasynyń Polısıa departamentiniń qyzmetkerlerimen esirtki jarnamalarynyń oryndaryn anyqtap, olardyń zańsyz jazbalaryn óshirdi. Reıd barysynda 1 kúnniń ishinde ǵımarattardyń syrtqy qabyrǵasyna jazylǵan 100-den asa jarnama anyqtalyp, joıyldy.
«Osy aksıaǵa qatysyp qala jastary ortaq maqsat úshin biriktik. Biz zańsyz jarnamalardy óshirip, olardyń ár qaraı taralmaýyna kishkene bolsa da óz úlesimizdi qosyp jatyrmyz», - dedi volonter Bekturǵanov Kúshqýat.
Uıymdastyrýshylardyń aıtýynsha, bul aksıa bir rettik emes, júıeli túrde ótip turady.
