Konstıtýsıalyq reforma jónindegi komısıanyń 12-otyrysynda Qazaqstan Respýblıkasy Parlamenti Májilisiniń depýtaty, «Aq jol» partıasy fraksıasynyń jetekshisi Azat Perýashev jańa Konstıtýsıa jobasyn qoldaıtynyn málimdep, ony jalpyhalyqtyq referendýmǵa shyǵarýdy usyndy.
Depýtat jańa Ata zańnyń jobasy boıynsha shamamen jarty jylǵa sozylǵan jumys barysynda fraksıa parlamenttik reformaǵa jáne qujattyń ózge de bólimderine qatysty 50-den astam túzetý joldaǵanyn aıtty.
Perýashev kásipkerlik quqyǵyn qorǵaý, menshik nysandarynyń alýan túrliligi men kepildikterin saqtaý, sondaı-aq bank jáne komersıalyq qupıany qorǵaý týraly erejeler jańa Konstıtýsıadaǵy ózge de jańashyl normalarmen birge kásipkerlerdiń zańdy quqyqtaryn qorǵaýǵa, ınvestısıalyq ahýaldy jaqsartýǵa jáne jeke bıznestiń damýyna oń áser etetinine toqtaldy.
«Elimizge jaı ǵana ınvestısıa emes, eń ozyq tehnologıalardy ákelýge múmkindik beretin «jedel damıtyn qalalarǵa» erekshe mártebe berý múmkindigin asa mańyzdy dep sanaımyz. Óıtkeni jańa ónimder, taýarlar men qyzmet túrleri paıda bolǵanda, olardy retteý tetikteri árdaıym úlgere bermeıdi», – dep atap ótti ol.
Fraksıa jetekshisi partıanyń bir palataly Parlamentke kóshý qajettigi jónindegi ustanymyn taǵy da rastady. Onyń aıtýynsha, partıa bul modeldi dáıekti túrde jaqtap keledi jáne Konstıtýsıa jobasy «Aq joldyń» ulttyq bıznes pen otandyq kásipkerlerdiń múddesin qorǵaý baǵytyndaǵy kózqarastary men qaǵıdattaryna sáıkes keledi.
«Qujat joǵary uıymdastyrýshylyq ári mazmundyq deńgeıde ázirlendi dep esepteımiz. Áriptesterimizdiń jańa Konstıtýsıa jobasyn jalpyhalyqtyq referendýmǵa shyǵarý jónindegi usynysyn qoldaımyz», – dedi Azat Perýashev.
