Reseı prezıdenti Vladımır Pýtın jaqynda Qytaıǵa saparlaı bardy. Bul sapardan keıin Reseı-Qytaı qarym-qatynasy jańa deńgeıge kóterilip, ózara tıimdi odaqtastyq baǵytqa damyp bara jatqanyn kórsetti. Degenmen, eki eldiń bir-birine tereń jaqyndastyǵy ózge alyp elderden alshaqtatyp jiberýi múmkin. Bul rette máseleni Úndistan turǵysynan qarastyryp kórmekpiz.
Azıadaǵy úsh alyp eldiń ortasyndaǵy qarym-qatynas formýlasy bylaı:
Reseı-Qytaı arasy jaqyn, Qytaı-Úndistan arasy salqyn, esesine Úndistan men Reseı mańyzdy seriktes.
Reseı-Qytaı alánsy qarqyndy damyǵan kezde, Úndistan óziniń Reseımen qarym-qatynasynyń bolashaǵynan alańdaı bastady. Sebebi, Jańa-Delıdiń Beıjińmen túbirli qaıshylyqtary bar. Uzaq ýaqyt jibimeı kele jatqan tońteris taqyryptar ásirese shekara máselesinde. Al Máskeýmen qarym-qatynasy turaqty kúıdegi Jańa-Delı úshin osy úshjaqty formýlanyń qazirgi kúıi qolaısyzdyqtar ákelýi múmkin.
Úndistan taraby Pýtınniń Qytaıǵa saparyn jiti qadaǵalady. Sapar kezinde úndi sarapshylary Reseı-Qytaı qarym-qatynasyna san qyrynan toqtalyp jatty. Úndistannyń Reseımen uzaq merzimdi áskerı jáne qorǵanys salasyndaǵy baılanystaryn jáne shekaralyq máselelerge baılanysty Qytaımen jalǵasyp kele jatqan qaıshylyqtaryn eskergende Jańa-Delı barynsha saqtyq tanytady dep boljaýǵa bolady.
Dál qazir Reseı men Qytaı arasyndaǵy qarym-qatynastyń tereńdeı túsýi Úndistan úshin strategıalyq, ekonomıkalyq jáne qaýipsizdik máselelerinde úlken suraqtardy jaratty. Eń qıyny – Qytaı men Reseı arasyndaǵy qorǵanys salasyndaǵy yntymaqtastyq. Pýtın saparyndaǵy birlesken málimdemeler eki eldiń ózara senimniń joǵary deńgeıde ekenin kórsetkendeı boldy. Mine osy máslele úndisterdi alańdatady.
Biraq, Úndistan úshin jańa jol daıyn. Amerıka Qurama Shtattary Úndi-Tynyq muhıty aımaǵynda 2019 jyldan beri jańa strategıany júzege asyryp jatyr. Ári sodan beri Úndistandy Reseıden de, Qytaıdan da bólip alyp, ózine seriktes tipti odaqtas etýge kúsh salyp keledi. Sheteldik keıbir sarapshylardyń pikirinshe Máskeý men Pekın arasynyń jaqyndaı túsýi Jańa-Delıdi Vashıngtonǵa qaraı bastaıdy dep sanaıdy.
