2026 jyly elimizde bokstan stýdentter arasynda álem chempıonaty dúbirli dodasy ótýi ábden múmkin. «Almaty qalasynda qurlyqaralyq bul dodany ótkizýge ǵımarattarymyz da jetkilikti, múmkindigimiz de bar!». Bul týraly búgin Qazaqstannyń Ulttyq stýdenttik sport odaǵynyń prezıdenti Qaırat Zakıránov málimdedi.
«Dúnıejúzilik stýdenttik sport basshylyǵymen kezdesý barysynda biz óńirdegi stýdenttik sportty damytý, yntymaqtastyq strategıasy jáne Ortalyq Azıada stýdenttik sport jobalaryn ilgeriletý bastamalaryn talqyladyq. Men 2026 jyly Qazaqstanda stýdentter arasyndaǵy bokstan álem chempıonatyn ótkizý týraly usynys jasadym jáne oǵan qoldaý bildirildi. Bul Halyqaralyq stýdenttik sport federasıasynyń jáne ózge de álemdik uıymdardyń elimizge degen zor senimin kórsetedi», – dedi ol.
Almatynyń 2026 jylǵy stýdentter arasyndaǵy boks álem chempıonatyn qabyldaýy – tek iri sporttyq is-shara emes, halyqaralyq senim men el ımıjin nyǵaıtý jolyndaǵy úlken qadam.
Qaırat Zakıránov sondaı-aq WORLD Boxing uıymynyń bul bastamaǵa resmı qoldaý kórsetetinin atap ótti. Belgili qazaqstandyq sportshy Gennadıı Golovkın jaqynda osy uıymnyń basshysy bolyp taǵaıyndalǵan edi. Bul chempıonattyń mártebesin arttyryp, jarystyń halyqaralyq deńgeıdegi yqpalyn kúsheıtedi dep kútilýde. Baspasóz maslıhaty barysynda taǵy bir mańyzdy másele qozǵaldy – 2029 jylǵy Dúnıejúzilik qysqy Ýnıversıadany ekinshi ret Qazaqstanda ótkizý múmkindigi. Eger 2029 jylǵy Qysqy Ýnıversıada da Qazaqstanǵa berilse, elimizdiń stýdenttik sporttaǵy róli jańa deńgeıge kóterilýi múmkin.
«FISU bul taqyrypty da kóterdi. Bizde Ýnıversıadany joǵary deńgeıde ótkizý úshin barlyq alǵysharttar bar», – dedi Qaırat Zakıránov.
Ol 2017 jylǵy Qysqy Ýnıversıadanyń el men Almatynyń ımıjine zor áser etkenin, tarıhtaǵy eń úzdik stýdenttik oıyndardyń biri retinde tanylǵanyn eske saldy. Sol tájirıbe áli kúnge deıin qalanyń iri jarystar ótkizýge qabiletti senimdi alań retindegi bedelin nyǵaıtyp keledi.
Stýdenttik sporttyń ishki damýy men onyń pozısıasyn nyǵaıtý týraly aıta kele, Qaırat Zakıránov «Dene shynyqtyrý jáne sport týraly» Qazaqstan Respýblıkasy Zańyna ózgerister engizý josparlanyp otyrǵanyn jetkizdi. Atap aıtqanda, joǵary oqý oryndary janynan sport klýbtaryn qurý jáne olardyń bazasynda ártúrli sport túrleri boıynsha stýdenttik lıgalar júıesin qalyptastyrý usynylady. Bul jastardy sportqa kóbirek tartýǵa, sondaı-aq Almatyda jáne búkil elde belsendi, salaýatty jáne básekege qabiletti stýdenttik ortany qalyptastyrýǵa yqpal etpek.
