Almatyda LGBT nasıhatyna tyıym salatyn zańdy qoldaý boıynsha konferensıa ótti. İs-sharaǵa quqyq qorǵaýshylar, zańgerler men qoǵam belsendileri qatysty.
Quqyq qorǵaýshy Baǵıla Baltabaevanyń aıtýynsha, zań jobasy LGBT ókilderiniń quqyqtaryna nuqsan keltirýdi kózdemeıdi, kerisinshe, óskeleń urpaqtyń sanasyna teris áser etetin aqparat pen kontentten balalarymyzdy qorǵaýǵa baǵyttalǵan.
«Zań normalaryn pysyqtaý kezinde bir jyl boıy arnaıy zertteý júrgizildi. Onyń nátıjesi halyqtyń 85%-y LGBT nasıhatyna qarsy ekenin kórsetti. Kez-kelgen memleket óziniń ulttyq jáne otbasylyq qundylyqtaryn qorǵaýy kerek. Bul zań halyqaralyq normalarǵa qaıshy kelmeıdi», – deıdi Baltabaeva.
Óz kezeginde zańger Baǵdat Amandosuly bul zań jobasy Qazaqstannyń ulttyq qaýipsizdigi máselesimen tikeleı baılanysty ekenin atap ótti.
«Bul zań jobasy bizdiń múddelerimizge sáıkes keledi jáne ulttyq qundylyqtardy qorǵaýǵa baǵyttalǵan», – dedi ol.
Konferensıaǵa qatysýshylar jahandaný dáýirinde balalar úshin negizgi aqparat kózi ınternet ekenin atap ótti. Zertteýler kórsetkendeı, qazaqstandyq jasóspirimder kóbine jasyna sáıkes kelmeıtin 18+ kontentke tap bolady eken.
«Otbasy – qoǵamnyń irgetasy. Dál qazir qoǵamdaǵy otbasy ınstıtýtyn nyǵaıtý asa mańyzdy, al LGBT nasıhaty bizdiń halqymyzdyń qundylyqtary úshin qaýipti. Memleket qarqyndy damyp keledi, qoǵam áldeqaıda sanaly bola bastady. Ata-analar balalary úshin jaqsy ómirdi qalaıtyny belgili. Tárbıe otbasynan bastalady, dástúrli qundylyqtardy urpaqtan – urpaqqa berý mańyzdy», – dep atap ótti «Altyn Alqa» medaliniń ıegeri, «Qazaq analary – dástúrge jol» RQU Almaty fılıalynyń basshysy Láılá Dáýlet.
Qatysýshylardyń pikirinshe, qazir Qazaqstanda balalardy zıandy aqparattan qorǵaýǵa baǵyttalǵan zańdar bar, alaıda «LGBT-ni nasıhattaý» uǵymy naqty anyqtalmaǵan. Usynylǵan túzetýler bul olqylyqtyń ornyn toltyryp, barlyq salalyq zańdarda birkelki normalardyń bolýyn qamtamasyz etedi.
Esterińizge sala keteıik, byltyr Qazaqstanda «LGBT nasıhatyna» tyıym salýdy talap etetin petısıa jarıalanyp, sheshim qabyldaýǵa qajetti 50 myń qol jınalǵan bolatyn. Osydan keıin zań shyǵarýshy organnyń depýtattary LGBT nasıhatyna tyıym salý týraly bastama kóterdi. Bıyl 12 qarashada Parlament Májilisi ekinshi oqylymda bul zańdy maquldady. Endi ony Senat qaraıtyn bolady.
