«AZMK» JSHS óndiristik alańynda eńbek ujymymen kezdesý ótti. Shara barysynda kásiporynnyń ishki jumysy tanystyrylyp, jumysshylarmen tikeleı pikir almasý uıymdastyryldy, - dep habarlaıdy alnews.
Kezdesýge Qazaqstan Respýblıkasy Parlamenti Májilisiniń depýtaty, Konstıtýsıalyq komısıanyń múshesi Sergeı Ponomarev qatysty. Ol aldaǵy referendým aıasynda usynylyp otyrǵan jańa Konstıtýsıa jobasynyń negizgi baǵyttary men mańyzdylyǵyna toqtalyp jumysshylarmen tildesti.
Sergeı Ponomarev óz sózinde Konstıtýsıa – eldiń bolashaǵyn aıqyndaıtyn basty qujat ekenin atap ótti:
«Qurmetti otandastar!Búgin biz ortaq úıimiz – Qazaqstannyń taǵdyryn aıqyndap otyrmyz. Kún saıyn halyqtyń naqty suranysyn estip, qoǵamnyń tynysyn jaqsy biletin depýtat ári jýrnalıs retinde nyq senimmen aıtamyn: jańa Konstıtýsıa – qoǵam kútken úmitke berilgen adal jaýap. Bul – úmitti naqty kepildikke aınaldyratyn qujat. Men bul jobany qoldaımyn, osy oraıda úsh negizgi máselege toqtalǵym keledi. Birinshiden, bul – birtutas halyqtyń Konstıtýsıasy. Konstıtýsıanyń preambýlasy men baptarynda Qazaqstan halqynyń birligi, tarıhı qazaq jerindegi memlekettilikti nyǵaıtý aıqyn kórsetilgen. Munda «ózimiz» jáne «ózge» degen uǵym joq. Árbir azamattyń ar-namysy men quqyǵy tili men etnostyq tegine qaramastan zańmen teń qorǵalady. Ekinshiden, bul – tikeleı dıalog Konstıtýsıasy. Biz jıi «bılik halyqty estýi tıis» degendi aıtamyz. Jańa Konstıtýsıa osy baǵytta úlken qadam jasap, biregeı ınstıtýt – Qazaqstan Halyq Keńesin qurýdy kózdeıdi. Úshinshiden, bul – ekologıalyq jaýapkershilik Konstıtýsıasy. Elin súıemin degen adam týǵan jeriniń lastanýyna beıjaı qaraı almaıdy. «Taza Qazaqstan» jalpyulttyq bastamasy ekologıa ár azamatty tolǵandyratyn másele ekenin kórsetti. Bul Konstıtýsıa – progresıvti ári ádil. Ol ashyq pikirtalastar men tikeleı efırler arqyly, eshqandaı súzgi men senzýrasyz talqylaýdan ótti. Bul qujat bizdi Halyq Keńesi arqyly biriktiredi, teń quqyq arqyly qorǵaıdy jáne bolashaǵymyzdy saqtaıdy. Bul – biz úshin jáne balalarymyz úshin jasalǵan Konstıtýsıa. Barshańyzdy azamattyq danalyq tanytýǵa shaqyramyn.Birge kúshti, taza ári ádiletti Qazaqstan quraıyq!»
Mýstafaev Aladın, saıasattanýshy:
«Búgin biz eldegi eń iri óndiristik ortalyqtardyń biri – AZMK kásipornynda bolyp, aldaǵy referendým aıasynda túsindirý jumystaryn júrgizdik. Kezdesý barysynda azamattarǵa Konstıtýsıaǵa engizilip jatqan ózgeristerdiń máni men mańyzyn jetkizýge basymdyq berildi.Atap aıtý kerek, usynylyp otyrǵan ózgerister jaı ǵana jekelegen túzetýler emes. Konstıtýsıanyń 74 paıyzdan astamy jańaryp, eldiń negizgi zańy túbegeıli jańasha sıpatqa ıe bolmaq. Bul – qoǵamnyń barlyq salasyn qamtıtyn aýqymdy ózgeris. Osy turǵyda árbir Qazaqstan azamatynyń daýys berýge qatysýy asa mańyzdy. Meniń oıymsha, eshkim óz memleketine, óz eliniń bolashaǵyna, balalarynyń erteńine beıjaı qaramaýy tıis. Ár azamat saılaý ýchaskesine kelip, óz tańdaýyn jasap, bolashaq urpaqtyń taǵdyry úshin daýys berýi qajet» - dedi.
