Almaty qalasynyń ákimi Darhan Satybaldy 1981 jyldan beri jahandyq tehnologıalyq trendterdi qalyptastyryp kele jatqan, álemdegi eń iri tehnologıalyq kórme – GITEX-tiń ǵalamdyq uıymdastyrýshysy inD kompanıasynyń ókilderi Trıksı Lo Mırmand pen Rýpert Adammen kezdesti, - dep habarlaıdy alnews.
Kezdesý barysynda Almatyda GITEX AI Central Asia & Caucasus Kazakhstan kórmesin ótkizý máseleleri jáne ony uıymdastyrýdyń naqty qadamdary talqylandy. Qala ákimi atap ótkendeı, Almaty brendtiń Ortalyq Azıaǵa ený núktesine aınalyp, halyqaralyq yntymaqtastyqty keńeıtýge, ınvestısıa tartýǵa jáne tehnologıalyq startaptardy ilgeriletýge jańa múmkindik ashady.
«Almaty óńirdegi jetekshi IT-hab retinde ózin áldeqashan tanytty: munda tehnologıalyq kompanıalar, halyqaralyq ortalyqtar shoǵyrlanǵan jáne belsendi startap-ekojúıe qurylǵan. GITEX forýmyn ótkizý bul jetistikterdi halyqaralyq deńgeıde tanystyrýǵa jáne qalaǵa jańa seriktester men ınvestorlardy tartýǵa múmkindik beredi», – dedi Darhan Satybaldy.
Onyń aıtýynsha, ınfraqurylymdy daıyndaý máselesine erekshe nazar aýdarylǵan. Atap aıtqanda, «Atakent» QİYO alańyn jańǵyrtý, logıstıkany uıymdastyrý jáne barlyq tartylǵan qyzmetterdiń úılesimdi jumysyn qamtamasyz etý kózdelgen. Almaty ákimi salalyq basqarmalarǵa uıymdastyrýshylarmen birlesip, daıyndyqtyń egjeı-tegjeıli josparyn ázirlep, onyń naqty oryndalýyn qamtamasyz etýdi tapsyrdy.
inD kompanıasynyń bas dırektory, GITEX-tiń ǵalamdyq uıymdastyrýshysy Trıksı Lo Mırmand óz sózinde:
«Almaty Eýropa men Azıa toǵysyndaǵy mańyzdy ınovasıalyq ortalyqtardyń birine aınalyp keledi. Bul – Qazaqstannyń sıfrlyq jáne jasandy ıntellekt baǵytyndaǵy ambısıalary naqty ekonomıkalyq ınfraqurylymǵa ulasatyn qala. GITEX osy úderisti jedeldetý úshin asa qolaıly kezeńde kelip otyr. Bul óńirdiń tehnologıalyq áleýetin, ınvestısıalyq tartymdylyǵyn jáne jahandyq baılanysyn kúsheıtedi. Nátıjesinde aımaq jasandy ıntellektke negizdelgen jańa ekonomıkanyń mańyzdy qatysýshysy retinde ornyǵady», – dep atap ótti.
Onyń aıtýynsha, 45 jyldan astam ýaqyt ishinde GITEX úkimetter, korporasıalar, startaptar, ınvestorlar jáne tehnologıalyq ekojúıeniń negizgi oıynshylary arasynda senimdi seriktes retinde halyqaralyq bedelge ıe bolyp, álemdegi eń iri tehnologıalyq is-sharalar brendine aınaldy.
Búginde GITEX 14 qala men elde, sonyń ishinde Abý-Dabı, Dýbaı, Brazılıa, Egıpet, Germanıa, Qazaqstan, Kenıa, Marokko, Nıgerıa, Serbıa, Sıngapýr, Túrkıa jáne Vetnamda ótkiziledi.
GITEX AI Central Asia & Caucasus Kazakhstan kórmesi Almatyda 2026 jyly 4–5 mamyr kúnderi ótedi. İs-sharaǵa álemniń ár túkpirinen startaptar, ınvestorlar jáne memlekettik qurylymdardyń ókilderi qatysady. Kórmeniń ótkizilýi qala men búkil óńir úshin mańyzdy oqıǵaǵa aınalyp, tehnologıalyq salanyń damýyna, halyqaralyq áriptestikti nyǵaıtýǵa jáne ınovasıalyq ekonomıkany qurýǵa qosymsha serpin beredi.
2026 jylǵy ekspozısıa úsh basym baǵytqa shoǵyrlanady: jasandy ıntellekt (tehnologıalardy qalalyq orta men bızneske ıntegrasıalaý), GovTech (Qazaqstannyń sıfrlyq memlekettik qyzmetter salasyndaǵy jetistikterin tanystyrý), kıberqaýipsizdik (derekterdi jáne bulttyq esepteýlerdi qorǵaý sheshimderi), sondaı-aq is-sharanyń qala ekonomıkasyna yqpaly (jyljymaıtyn múlik, valúta jáne ınvestısıalar) qarastyrylady.
