Almaty halyq sany jaǵynan respýblıkanyń kósh basyndaǵy qala. Elimizdegi ýrbanızasıa úrdisi, ishki kóshi-qon jáne demografıalyq jaǵdaıdyń nátıjesinde Almaty halqynyń sany da jyl saıyn artýda. Bul óz kezeginde qalanyń ınfraqurylymy men ózge de áleýmettik salalaryndaǵy qysymdy arttyrýda. Sonyń biri bilim berý salasy.
Mektep jasyndaǵy balalar sany boıynsha da Almaty respýblıkanyń kósh basynda. Bıylǵy oqý jylymen qarastyrǵanda qalada 336 486 myń oqýshy mektep qabyrǵasynda bilim alýda. Al qaladaǵy orta bilim berý mekemeleriniń jalpy sany 337 bolsa, onyń 215-i memlekettik, 122-i jekemenshik bilim berý mekemesi sanalady.
Atap ótkenimizdeı, mektep jasyndaǵy balalar sany jyl saıyn on myńdap kóbeıip otyrǵandyqtan, qalada oqýshy oryndarynyń tapshylyǵy bar. Almaty qalasy Bilim basqarmasynyń deregine qaraǵansha qazir shaharda mektep jasyndaǵy balalar sany jyl saıyn 12-14 myńǵa kóbeıý ústinde. Aıtalyq, byltyrǵy oqý jylynda 13 086 oqýshy 11-synypty bitirse, 8130 túlek 9-synypty bitirgen. Sonyń ózinde mektep tabaldyryǵyn attaǵan balalar sany budan bir eseden kóp. Iaǵnı, bıylǵy jańa oqý maýsymynda Almatyda 28 144 bala mektep tabaldyrǵyn attaǵan. Bul sońǵy jyldardaǵy turaqty úrdiske aınalǵan.
Mektep jasyndaǵy balalardyń 300 797-si memleketke qarasty bilim berý mekemelerinde bilim alady. Al jekemenshik mekemelerdegi oqýshylar sany 35 689. Almaty shaharynda qazirgi oqýshy oryndarynyń tapshylyǵy 30 878 -di quraıdy.
Almaty qalasy ákimdigi jaǵynan qaladaǵy oqýshy oryndary tapshylyǵy máselesi basty nazarda ustalyp keledi. Prezıdent Qasym-Jomart Toqaevtyń bastamasymen júzege asyrylyp kele jatqan «Jaıly mektep» ulttyq jobasy aıasynda da qalada jańa mektepter salyný ústinde. Aıtalyq atalmysh ulttyq joba arqyly Almatyda 36800 oqýshyǵa arnalǵan 22 mektep salynýda. Aıta keteıik, jańadan salynyp jatqan 22 mekteptiń 13-i «Samruk-Kazyna Construction» AQ tapsyrysy boıynsha salynýda. Ulttyq joba aıasyndaǵy mektep qurylystary aıaqtalsa 36800 oqýshy orny paıdala bolady.
