Almatyda Jumysshy mamandyqtar jyly saltanatty túrde jabýǵa arnalǵan «ALMATY PROF SKILLS: nátıjeleri jáne damý perspektıvalary» atty qalalyq forýmy ótti, - dep habarlaıdy alnews.
İs-shara barysynda Memleket basshysynyń tehnıkalyq jáne kásiptik bilim berý júıesin reformalaý boıynsha tapsyrmalaryn oryndaý, jumysshy mamandyqtar jylynda qol jetkizilgen nátıjeler men úzdik tájirıbeler boıynsha qorytyndy jasaldy.
Alataý aýdanyndaǵy Oqýshylardyń ınovasıalyq shyǵarmashylyq ortalyǵyda qalalyq kolej stýdentteri arnaıy kórme uıymdastyrdy. Onda kolejderge seriktes kásiporyndar men tálimgerler birikken jumys nátıjelerin pash etti.
Sondaı-aq, saltanatty is-shara barysynda tehnıkalyq jáne kásiptik bilim berý júıesin damytýǵa eleýli úles qosqan oqytýshylar men mamandar marapattaldy. Respýblıkalyq WorldSkills baıqaýynda komandalyq birinshi orynǵa ıe bolǵan Almaty kolejderiniń stýdentterine qarjylaı syılyqtar tabystaldy.
-Bıyl aýyz toltyryp aıtatyn jetistikterimiz bar. Sonyń ishinde erekshe almatylyq komandanyń «WorldSkills Kazakhstan» chempıonatynda júldeli birinshi oryn alýyn atap ótýge bolady. Almaty qashanda bilim, bıznes, mádenıet ortalyǵy bolǵan, solaı bolyp qala beredi. Alyp shahar Almaty kúrdeli damý ústinde jáne onyń ekonomıkasy da kúrdelene túsedi. Soǵan sáıkes, biz qala suranysyn qamtamasyz etetin tıisti mamandardy daıyndaı bilýimiz kerek. Osy baǵytta kolejder jelisiniń atqaratyn orny orasan zor. Prezıdentimiz Qasym-Jomart Kemeluly jarıalaǵan «Jumysshy mamandyqtar jyly» bul jylmen toqtap qalmaıdy. Bul tek úlken bir joldyń taǵy bir belesi, – dedi Almaty ákiminiń orynbasary Abzal Núkenov.
Aıta ketken jón, qazirgi ýaqytta megapolıste ekonomıkanyń negizgi salalary úshin mamandar daıyndaıtyn 88 kolej jumys isteıdi. Olardyń 22-si memlekettik, 66-sy jekemenshik. Pedagogtardyń jalpy sany – 5 626 adam, al stýdentter sany – 86 818 adamǵa jetedi. Olardyń jartysynan kóbi (50 428) memlekettik grant esebinen bilim alady.
Odan bólek Almaty kolejderinde daıyndyq 131 mamandyq boıynsha jáne 220 biliktilik boıynsha júrgiziledi. Bul baǵyttar qurylys, kólik, energetıka, qyzmet kórsetý salasy, bilim berý, densaýlyq saqtaý, ekonomıka, baılanys jáne IT sıaqty eńbek naryǵynyń qajettilikterin eskere otyryp qalyptastyrylǵan. 2025 jylǵy túlekterdiń 94,3%-y sátti jumysqa ornalasty. Bolashaq mamandardy eńbek naryǵynyń talaptaryna beıimdeý jáne óndiristiń naqty jaǵdaılarynda tájirıbelik daǵdylar qalyptastyrý maqsatynda 770 kásiporynmen yntymaqtastyq týraly kelisimder jasalǵan. 52 kolejde dýaldy oqytý túri boıynsha 22 067 stýdent oqıdy. Iaǵnı teorıalyq bilimnen bólek seriktes kásiporynda jumys istep, tájirıbe jınaı alady.
Sonymen qatar, 2025 jyly 132 oqytýshy AQSH, Qytaı jáne Sıngapýrda taǵylymdamadan ótti. Halyqaralyq yntymaqtastyq – Almaty kásiptik bilim berý júıesin damytýdyń mańyzdy baǵyty.
