2026 jyldyń 15 qańtarynda Rustem Omarov YouTube-arnasynda (sondaı-aq serıa sıpattamasynda kórsetilgen platformalarda) qazaqstandyq tanymal «Moshennıkı» serıalynyń ekinshi maýsymynyń tusaýkeseri ótedi, - dep habarlaıdy alnews.
Ártúrli alaıaqtyq sqemalarǵa mamandanǵan salqynqandylyqpen áreket etetin qylmysker Damırdiń oqıǵalaryn baıandaıtyn avantúralyq saga bul joly Túrkıadan bastalady. Onda ol TMD elderiniń turǵyndaryna túrik jyljymaıtyn múlkin satý arqyly aýqymdy alaıaqtyqty júzege asyrady. Sheteldegi isterin aıaqtaǵan soń, Damır otanyna oralyp, birinshi maýsymnan kórermenge tanys keıipkerlerden óz komandasyn qaıta jınaıdy.
Bul maýsymda Damır men onyń komandasy qazirgi zamanǵy, shynaıy qylmyskerler qoldanatyn jańa ári ózekti alaıaqtyq sqemalaryn iske asyrady. Olardyń qatarynda sıfrlyq tehnologıalarmen baılanysty, onyń ishinde jasandy ıntellektini qoldanatyn alaıaqtyq sqemalary da bar.
Jobanyń ekinshi maýsymy Salem Entertainment pen BAS Production kompanıalarynyń birlesken eńbeginiń nátıjesinde júzege asty. Osyǵan deıin birinshi maýsymnyń tizginin ustaǵan Oljas Nurbaı, ekinshi maýsymnyń da qoıýshy-rejısseri boldy.
Joba avtorlarynyń negizgi maqsaty sapaly oıyn-saýyq kontentin usyný ǵana emes, qazirgi qoǵamdaǵy eń ózekti ári ótkir máselelerdiń birin ashyp kórsetý. Serıalda bárine tanymal alaıaqtyq sqemalar qylmyskerlerdiń tarapynan baıandalady.
Serıaldaǵy árbir oqıǵa ózindik ereksheligimen daralanyp, al sońy eshkim kútpegendeı aıaqtalady. Kórermenge avtokólik alypsatarlardan bastap, ınternet-fıshıngke deıingi qylmystyq áreketterdiń ishki mehanızmi kórsetiledi.
Serıaldyń basty mindeti — kórermendi aqparattandyrý jáne qorǵaý, alaıaqtardyń naqty qalaı áreket etetinin kórsetý. Osy arqyly árbir adam olardyń ádisterin tanyp, qurban bolmaı, abaı bolýdy úırenedi. Óıtkeni, árbir adam mundaı alaıaqtyqpen kezdesken nemese bolashaqta kezdesip qalýy múmkin.
«Moshennıkı» jobasynyń ıdeıalyq shabyttandyrýshysy, prodúseri ári basty róldi somdaýshy — qazaqstandyq tanymal akter Rýstem Omarov:
— Ekinshi maýsymdy daıyndaý barysynda biz qoıylǵan deńgeıdi esh jaǵdaıda tómendetýge bolmaıtynyn naqty túsindik. Sondyqtan jobanyń jalǵasy geografıalyq turǵydan da, qamtylǵan shynaıy alaıaqtyq keısteri boıynsha da aýqymdyraq boldy. Sonymen qatar, bul maýsymda kórermen Farıza keıipkerimen baılanysty eń ıntrıgalyq sújet jelileriniń biriniń sheshimin kóredi jáne kórermenniń kóńilinen shyǵatyn jańa keıipkerlermen tanysady.
«Moshennıkı» serıalynyń ekinshi maýsymy Damırdiń oqıǵasyn aıaqtamaıdy, kerisinshe 2026 jyldyń kókteminde kınoteatrlarda prokatqa shyǵatyn osy attas tolyqmetrajdy fılmge daıyndyq qyzmetin atqarady.
«Moshennıkı 2» jobasy týraly aqparat:
Qoıýshy-rejısser: Oljas Nurbaı
Qoıýshy-operator: Azamat Janabekov
Qoıýshy-sýretshi: Svetlana Nechepýrenko
Bas prodúserler: Rýstem Omarov, Igor Saı, Qýat Sadyqov, Orynbasar Qudaıbergenov, Aqylbek Dosjanov, Saıda Igenbek
Ideıa avtorlary: Rýstem Omarov, Ilhan Isqakbaev
Senarı avtorlary: Rýstem Omarov, Ilhan Isqakbaev
Basty rólderde: Rýstem Omarov, Azamat Nıgmanov, Muhamedjan Mamaev, Farıza Eskermes, Qarlyǵash Muhamedjanova, Azamat Shaker, Aqylhan Almasov.
