Almaty qalasy joǵary ekonomıkalyq belsendilikke ıe. Sondyqtan da qarjylyq jáne ekonomıkalyq qylmystar da ózge óńirlerden kóbirek tirkeledi. Jaqynda Óńirlik komýnıkasıalar qyzmeti ótkizgen baspasóz alańynda Ekonomıkalyq tergeý departamentiniń sońǵy aılardaǵy jumys nátıjesi aqparat quraldaryna jarıalandy. Belgili bolǵandaı atalǵan quzyrly mekeme jaǵynan kóleńkeli ekonomıka, ásirese sıfrlyq aktıvterdiń zańsyz aınalymyna qatysty qylmystar anyqtalǵan.
Vedomstvonyń málimetine qaraǵanda bıyl jyl basynan beri Almatyda 111 ekonomıkalyq qylmys tirkelip, onyń ishinde aýyr qylmysqa jatatyn 68 jaǵdaı bar. Tirkelgen júzden asa qylmystyń 79-y anyqtalyp sotqa jiberilgen. Tergeý nátıjesinde jáne múlikke tyıym salý áreketi arqyly memleketke 47,7 mlrd teńge qaıtarylǵan.
Quzyrly organnyń málimetine qaraǵanda, jyl basynan bergi ekonomıkalyq qylmystardy anyqtaý isinde aqshany jylystatý jáne zańsyz áreketterdi qarjylandyrý úshin jıi qoldanylatyn sıfrlyq aktıvterdiń zańsyz aınalymymen kúresýge basa nazar aýdarylǵan.
Aıta ketken jón, ekonomıkalyq qylmysqa qarsy áreketterde quzyrly organ 2023 jylǵy 6 aqpanda kúshine engen «QR - daǵy Sıfrlyq aktıvter týraly» jańa zańyn basshylyqqa alǵan. Onda «Astana» halyqaralyq qarjy ortalyǵynyń aýmaǵyn qospaǵanda, jalpy el aýmaǵynda qamtamasyz etilmegen sıfrlyq aktıvterdi shyǵarýǵa jáne aınalymna shekteý qoıylady. Al qamtamasyz etilmegen sıfrlyq aktıvterdiń aınalymy AHQO qarjy qyzmetterin retteý komıteti lısenzıalaǵan sýbektilerdiń alańdarynda ruqsat etilgen. Komıtet qamtamasyz etilmegen sıfrlyq aktıvteri bar lısenzıalanatyn qyzmet túrleri, ıaǵnı qarjy qyzmetterin kórsetetin sýbektilerdiń qataryna Binance, ByBit, Huobi, KuCoin jáne basqa da krıpto-bırjalardyń retteýshileri jatatynyn qosymshalady.
Óńirlik kommýnıkaısálar qyzmetiniń málimetinshe, qazirgi tańda kóleńkeli ekonomıka men onlaın-naryqtarda krıptovalúta belsendi qoldanylýda. Osy salalarda qoldanylatyn bıtkoınder men krıptovalútalardyń basqa túrleri is júzinde álemniń eshbir jerinde naqty zańdy jikteýi joq.
Búginniń ózinde atalǵan departamentte sıfrlyq aktıvterdi aıyrbastaý jónindegi zańsyz áreketke qatysty 6 qylmystyq is tergelý ústinde. Olardyń jalpy quny 58,5 mln AQSH dollarynan asady. Aldyn alý maqsatynda «Kıbernadzor» júıesi arqyly osyndaı qyzmetpen aınalysatyn 134 ınternet-resýrs buǵattaldy. Sondaı-aq, krıptovalútany zańsyz paıdalaný jaǵdaılaryn belsendi túrde zertteıtin sıfrlyq aktıvter salasyndaǵy quqyq buzýshylyqtarmen kúresý úshin arnaıy «Krıpton» bólimshesi quryldy.
Allnews
