Almatyda jańa formatta qyzmet kórsetýge baǵyttalǵan alǵashqy polısıa pýnktteri pılottyq rejımde iske qosyldy, - dep habarlaıdy alnews.
Jobany Memleket basshysynyń polısıa jumysynyń servıstik modeline kóshý jónindegi tapsyrmasy aıasynda, Almaty qalasy ákimdiginiń jobalyq keńsesiniń qoldaýymen qalalyq polısıa Departamenti júzege asyrýda. Onyń basty maqsaty - qoǵammen ashyq dıalog jáne turǵyndardyń ótinishterine jedel jaýap berý.
Qazirdiń ózinde qalanyń jeti aýdanynda polısıanyń qyzmet kórsetý ortalyqtary ashyldy. Segizinshisi bıyl qazan aıynda Túrksib aýdanynda ashylady. Ǵımarat qalalyq búdjet esebinen satyp alynyp, Departament balansyna berildi. Onda ákimshilik, kóshi-qon, ıývenaldyq polısıa, ýchaskelik ınspektorlar máseleleri boıynsha mamandardan keńester alyp, qyzmet kórsetýge qolaıly jaǵdaı jasalǵan.
«Polısıanyń servıstik modeli klıentke baǵyttalǵan tásildi, quqyq qorǵaý organdarynyń ashyqtyǵy men esep berýin, azamattardyń polısıa qyzmetine ońaı qol jetkizýin bildiredi. Sonyń nátıjesinde halyqtyń polısıaǵa degen senimi, azamattarmen ashyq áriptestik pen Qazaqstan halqyna qyzmet etýdegi beıtaraptyq deńgeıi artady dep kútemiz», - dedi, Almaty qalalyq PD bastyǵynyń birinshi orynbasary, polısıa polkovnıgi Nurlan Almasbekov.
Eki jarym aılyq jumys barysynda ortalyq qyzmetkerleri qala turǵyndary men qonaqtarynyń 8,5 myń ótinishin óńdedi.
Polısıanyń qyzmet kórsetý ortalyqtary barlyǵy 55 qyzmet túrin kórsetedi. Ol úshin barlyq jaǵdaı jasalǵan – ınspektorlar men psıhologtar jeke kabınetterde qabyldaý júrgizedi. Kóshi-qon polısıasynyń qyzmetkerleri shetel azamattaryn tirkeý nemese qaıta tirkeý, Qazaqstan Respýblıkasynan tysqary jerlerge ketý nemese kelý kezinde azamattyq alý jáne turaqty turý úshin qujattardy resimdeýmen aınalysady. Kólik ıeleri jol-kólik oqıǵasy derekteri boıynsha keńes ala alady, kólik quraldarynda ákimshilik aıyppuldar, aýyrtpalyqtar men shekteýler bar-joǵyn tekserip, kólikti qaıta jabdyqtaýǵa qujattardy rásimdeı alady.
Ortalyqtarda zańgerler, medıatorlar, ishki ister organdaryna oqýǵa jáne qyzmetke qabyldaý úshin keńesshiler, sondaı-aq qarýdy alyp júrýge jáne saqtaýǵa ruqsat beretin qyzmetkerler jumys isteıdi. Sondaı-aq azamattardy qabyldaýdy prosesýaldyq sheshim qabyldaýǵa ýákiletti quzyretti qyzmetkerler – tergeýshiler, jedel ýákilder, ýchaskelik ınspektorlar júrgizedi. Buryn berilgen ótinishtiń qaralý barysy týraly bilýge nemese jaýapkershilikke tartý sebepteri týraly aqparat alýǵa múmkindik beretin derekqorlarǵa qoljetimdilik qamtamasyz etiledi.
Ortalyqtardyń jumys ýaqyty - 9:00-den 20:00-ge deıin. Saǵat 23:00-ge deıin ýchaskelik polısıa ınspektorlarynyń azamattardy qabyldaýyn uıymdastyrýǵa bolady. Qala ákiminiń tapsyrmasy boıynsha turǵyndarmen tikeleı baılanysta bolatyn bul qyzmetti damytýǵa erekshe kóńil bólinýde. Aldaǵy ýaqytta muraǵattyq anyqtamalarǵa apostıl qoıý jáne basqa da qyzmetter boıynsha polısıanyń qyzmet kórsetý ortalyqtarynyń fýnksıonaldyǵyn keńeıtý josparlanýda.
Polısıanyń qyzmet kórsetý ortalyqtarynyń mekenjaılaryn 2GIS qosymshasynan tabýǵa bolady.
1. Almaly aýdany, Tóle bı kósh., 273A úı, 1;
2. Áýezov aýdany, Jetisý-3 shaǵyn aýdany, № 5úı, 18;
3. Jetisý aýdany, Aınabulaq shaǵyn aýdany, 40A úı, 2 korpýs, 17;
4. Medeý aýdany, Potanın kósh., 14/17 úı, 108;
5. Bostandyq aýdany, Kóktem 3 shaǵyn aýdany, № 24 úı;
6. Alataý aýdany, Aqbulaq shaǵyn aýdany, Sýatkól kósh., 33/1 úı, 2;
7. Naýryzbaı aýdany, Shuǵyla shaǵyn aýdany, 347.
