«Almaty – bizdiń ortaq úıimiz». Almatylyqtardy súıikti qalamyzdy taza da jaıly etýge shaqyratyn naýqan osylaı atalady. Respýblıka kóleminde ótip jatqan «Taza Qazaqstan» aksıasyna oraı qalada kóktemgi tazalyq jumystary qarqyndy júrip jatyr.
Igi iske qala tazalyǵyna jaýapty mamandar, tazalaýshy jumyskerler, sondaı-aq qala tazalyǵyna nemquraıly qaramaıtyn eriktiler de qatysýda.
Búgin tazalaý jumystary Abaı dańǵyly men Naýryzbaı kóshesinen bastap Tımırázev kóshesine deıingi aralyqty qamtydy.
Aksıa 1 aıǵa josparlanǵan, sáýir aıynda da jalǵasyn tappaq. Naýqannyń basty maqsaty – kórikti taza qalany budan da uqypty ustaý.
Bul jóninde Bostandyq aýdany kóriktendirý bóliminiń bas mamany Nursultan Orazymbetov málimdedi.
– Biz 1 naýryzdan bastap 375 kósheniń tazalaý jumystaryna keshendi túrde kiristik. Aıta keterligi, kóshe, aryq boıyn ǵana tazalap qoımaı, turǵyn úılerdiń arasyna deıin tazalap júrmiz. Atalmysh jumystarǵa 12-13 tehnıka, 40–45 jumysker tartylǵan. Alda Instagram, Facebook paraqshalarymyzda jurtshylyqty erikti túrde óz qalamyzdy tazartýǵa senbilikke shaqyratyn bolamyz. Mundaı ıgi ister óz jalǵasyn tabady, – dedi ol.
Sonymen qatar, «Almaty tazalyq» memlekettik komýnaldyq kásiporyny jumyskerleri de ózderiniń kúndelikti jumys barysy týraly aıtyp berdi.
– Almaty qalasynyń tazalyǵyna óz úlesimizdi qosyp júrmiz. Bul bizdiń qalyptasqan sharýamyz. Ózimizge belgilengen kóshe boıy men aryqtar saǵasyn qoqystan tazartamyz. Osylaısha kúnniń ystyq-sýyǵyna qaramaı eńbek atqarylady, – dedi tazalyqshy Venera Beısenova.
