Almatyda respýblıkalyq «Taza Qazaqstan» baǵdarlamasy aıasynda aýqymdy ekologıalyq «Almaty – bizdiń ortaq úıimiz» atty naýqan jalǵasýda. Qala tazalyǵyn saqtaýǵa baǵyttalǵan bul bastama megapolıstiń barlyq aýdandarynda belsendi túrde júzege asyrylyp jatyr.
Naýryz aıynyń alǵashqy onkúndigi «Taza kósheler» uranymen ótýde. Bul kezeńde kóshe boıyndaǵy qoqysty tazalaý, aıaldamalardy retke keltirý, jol belgilerin kirden aryltý, aryqtardy qoqystan tazartý jáne qosymsha qoqys jáshikterin ornatý sıaqty mańyzdy jumystar atqarylýda.
– «Almaty – bizdiń ortaq úıimiz» ekologıalyq naýqany aıasynda Medeý aýdanynda merdiger uıymdarmen birlesip, keń kólemdi sanıtarlyq tazartý jumystary júrgizilýde. Bul jumystarǵa 200-ge jýyq jol jumysshysy men arnaıy 80 tehnıka jumyldyryldy. Qazirgi tańda magıstraldyq kóshelermen birge saıabaqtar, gúlzarlar, jaıaý júrginshiler joldary men aryq júıeleri retke keltirilýde. Búgin Omarov kóshesiniń boıynda, Dostyq dańǵylynan Kóktóbe shlagbaýmyna deıingi aralyqta aýqymdy tazalyq jumystary júrgizildi. Jol jumysshylary kóshe boıyn sypyryp, jol jıeginde qatqan qarlardy arnaıy kólikterge tıep shyǵardy. «Qasbetten qasbetke deıin» aksıasy aıasynda aryq jelileri de tazartylyp, jol jıekteri tolyǵymen qoqystan arshyldy», – deıdi Medeý aýdany ákimi apparatynyń kóriktendirý bóliminiń basshysy Abylaı Mákeı.
Kóktemgi abattandyrý jumystarynyń bir baǵyty – joldardy jóndeý. Búginde Medeý aýdanynda shuńqyrlardy jamaý, aryqtar men jıektastardy qalpyna keltirý jumystary da júrgizilip jatyr. Aýdanda 367 kóshe bar, olardyń jalpy uzyndyǵy 522,9 shaqyrymnan asady. Kún saıyn keminde eki-úsh kóshede tazalyq is-sharalary ótedi. Búgingi tazalyq jumystaryna 10-ǵa jýyq arnaıy tehnıka men 20 jol jumysshysy jumyldyrylǵan.
– «Bizdiń basty maqsatymyz – aýdan turǵyndary men qala qonaqtaryna taza, kórkem ári jaıly orta syılaý. Bul tek ákimdik pen komýnaldyq qyzmetterdiń mindeti ǵana emes, árbir turǵyn óziniń aýlasyn, kóshesin taza ustaýǵa atsalysýy kerek. Sondyqtan barshańyzdy osy naýqanǵa belsendi qatysýǵa shaqyramyz!», – deıdi Kóriktendirý bóliminiń basshysy.
Kóktem – jańarý kezeńi, sondyqtan dál osy ýaqytta qalany tártipke keltirý asa mańyzdy. Turǵyndar arasynda ekologıalyq mádenıetti qalyptastyrý da basty nazarda. Bul jóninde jol jumysshysy Perdegúl Álimbaeva óz oıyn bildirdi.
– «Tazalyq – tek jınaǵan jerde emes, qoqys tastalmaǵan jerde bolady. Óz basym Almatynyń tazalyǵy men kórkeıýine barlyǵymyz birdeı jaýaptymyz dep bilemin. Meniń qala tazalyǵyna úles qosyp, jol jumysshysy bolyp eńbek etip kele jatqanyma 32 jyl boldy. Almatyny erekshe jaqsy kóremin. Qala turǵyndary onyń sulýlyǵyn baǵalap, tazalyǵyn saqtaýǵa úles qosady dep úmittenemin, – deıdi Perdegúl Bazarbaıqyzy.
Qala tazalyǵyna nemquraıly qaramaıtyn Almaty turǵyndary arasynda eriktiler de bar. Solardyń biri – Sergeı Statev. Ol birneshe jyldan beri kóktem men jaz aılarynda volonterlik toptarmen birge qalany qoqystan tazartýǵa atsalysyp keledi.
– Men árqashan tazalyqty qoldaımyn. Qala taza bolǵanda, kóz qýanyp, kóńil kóteriledi. Sondyqtan dostarymmen birge senbilikterge jıi qatysamyn. Búgin komýnaldyq qyzmetterdiń jumysyn kórip, erekshe qýandym – kún shyǵyp, kóktem kelip, aınala jańaryp jatyr. Mundaı aksıalar qalanyń kórkin ashyp, adamdardy tártipke úıretedi», – deıdi ol.
Eske sala keteıik, 1 naýryz ben 1 sáýir aralyǵynda Almatyda «Almaty – bizdiń ortaq úıimiz» naýqany ótedi. Bul is-shara tórt kezeńnen turady:
• «Taza kósheler» (1–9 naýryz) – aıaldamalar men jol belgilerin tazalaý, qoqys jáshikterin ornatý, magıstraldardy abattandyrý;
• «Taza saıabaqtar, skverler jáne taýlar» (10–16 naýryz) – tabıǵı aımaqtarda senbilikter uıymdastyrý, qoqys jınaý is-sharalary;
• «Taza aýlalar» (17–23 naýryz) – aýlalar men oıyn alańdaryn tazalaý jáne boıaý, kógaldandyrý, «Úzdik aýla/aýla sypyrýshysy/gúlzar» baıqaýlary;
• «Bizdiń qala – bizdiń maqtanyshymyz» (24 naýryz – 1 sáýir) – eskertkishterdi abattandyrý jáne aǵash otyrǵyzý boıynsha jappaı is-sharalar.
