Búgin – «Naýryznama onkúndigi» aıasyndaǵy «Tazarý kúni». Sondaı-aq, ár aıdyń osy kúninde el kóleminde «Taza Qazaqstan» ekologıalyq aksıasyna basymdyq berilip keledi. «Almaty – bizdiń ortaq úıimiz», «Almaty Clean&Green» – mine, bunyń bári qalamyzdyń belsendi júzege asyryp jatqan ekologıalyq naýqany.
Búgin «Alatau-Aqparat» ujymy óz aýmaǵynda senbilik ótkizip, respýblıkalyq jáne qalalyq aýqymdy eko-aksıaǵa ún qosty.
Kópten beri jalǵasyp jatqan ekologıalyq bastamalardan ujym ókilderi tereń tanys. Qos basylym tilshileri kóptegen is-sharalardyń basy-qasynda bolyp aqparat taratyp, ıgi bastamalardyń keńirek násıhattalýyna kúsh salyp keledi. Al búgin tilshiler men ózge de qyzmetkerler ujym aýmaǵynda tazalyq jumystaryn jasap, «Tazarý kúnine» óz úlesterin qosty.
«Qalamyzdaǵy «Almaty – bizdiń ortaq úıimiz» ekologıalyq aksıasy kópten beri qyzý jalǵasyp keledi. Qala turǵyndary da bul aksıadan tolyq habar taýyp, ár jerde qala tazalyǵy úshin atsalysyp jatyr. Búgin biz óz aýmaǵymyzdy qoqystardan aryltyp, ózimiz násıhattaıtyn bastamaǵa shynaıy qoldaý kórsetip jatyrmyz», – deıdi «Almaty aqsham» gazetiniń bólim redaktory Raıa Esendir.
«Qala tazalyǵy shaǵyn aýmaqtardyń tazalyǵynan bastalady. Ár mekeme, ár ujym óz aýmaǵynyń tazalyǵyna, rettiligine, kógaly men kórkine jaýapkershilikpen qarasa, bul tutas qalamyzdyń taza da janǵa jaıly bolýyna áser eter edi. Mundaı senbilikter tek ataýly kúnde emes, árdaıym jekelegen ujymdardyń belsendiligimen ótip tursa, osyndaı tamasha daǵdy qalyptastyrsaq bizdiń ortaq úıimiz bolǵan Almaty budan da kórkeıe túser edi», – deıdi medıaholdıng qyzmetkeri Saǵıt Qaıyrjanuly.
Aıta keteıik, «Almaty – bizdiń ortaq úıimiz» ekologıalyq naýqany qalamyzdyń tazalyǵyn, turǵyndardyń orta qorǵaý tanymyn arttyrý baǵytynda júzege asyp jatqan bastama. Bul ár qala turǵyny atsalysa alatyn ári aınalasyna násıhattaýǵa turarlyq ortaq is. Ujym qyzmetkerleri barsha qala turǵyndaryn eko-sharaǵa atsalysyp, qalamyzdy birge kórkeıtýge shaqyrady.
