Almaty Naýryz meıramyn keń aýqymda atap ótýde.
Búgin Almaty naǵyz kóktem merekesiniń ortalyǵyna aınaldy – qala Naýryz meıramyn erekshe sán-saltanatpen toılaýda. Merekelik alańdar megapolıstiń túkpir-túkpirinde paıda boldy, dástúr boıynsha basty konsert Astana alańynda ótýde. Tań sáriden beri munda shattyqqa toly atmosfera, ulttyq rýh pen birliktiń aıqyn kórinisi seziledi.
Almaty ákimi Erbolat Dosaev saltanatty sharaǵa qatysyp, jańarý, tatýlyq pen bereke sımvoly – Naýryzdyń mańyzdylyǵyn atap ótti. Sondaı-aq, merekege Qazaqstannyń Eńbek Eri, halyq artısi Asanáli Áshimov, Halyq qaharmany Sát Toqpaqbaev, Qazaqstannyń Eńbek Eri Aıagúl Mırazova, Qazaqstan Jazýshylar odaǵynyń tóraǵasy Mereke Qulkenov jáne kóptegen zıaly qaýym ókilderi, qala turǵyndary men qonaqtary qatysty.
Kórermenderge «Almaty – Naýryz qushaǵynda» atty aýqymdy konsert usynyldy. Onda ańyzǵa aınalǵan óner juldyzdary: «Dos-Muqasan» ansambli, Maıra Muhamedqyzy, Janar Aıjanova, Ómirqul Aınıazov, «Sazgen sazy» fólklorlyq-etnografıalyq ansambli, Jazıra Baıyrbekova, Igor Blagorodnyı, Tólegen Rahymbaev, «KeshYOU» toby, Dınaıa, AyaFunk jáne basqa da tanymal ónerpazdar óner kórsetti.
Merekelik sharalar 23 naýryzǵa deıin jalǵasady. Kún saıyn saǵat 22:00-ge deıin qala qonaqtary men turǵyndary Juldyzdy Almaty festıvali aıasynda jarqyn konsertterdi, teatr qoıylymdaryn, ulttyq oıyndardy, túrli performanstar men qolóner jármeńkelerin tamashalaı alady.
