Búgin Abaı atyndaǵy Qazaq ulttyq pedagogıkalyq ýnıversıtetinde «Teorıadan tájirıbege: bolashaq muǵalimderdiń pedagogıkalyq praktıka nátıjeleri» atty bitirýshi kýrs bilim alýshylarynyń qorytyndy konferensıasy ótti, – dep habarlaıdy Alnews Aikyn.kz saıtyna silteme jasap.
Aýqymdy jıynǵa pedagogıkalyq mamandyqtardyń stýdentteri, óndiristik is-tájirıbe jetekshileri, orta bilim berý uıymdarynyń dırektorlary men muǵalimderi, sondaı-aq ýnıversıtettiń profesor-oqytýshylar quramy qatysty. Jıyndy Mansap ortalyǵynyń basshysy Raqymberdi Jetibaı moderator retinde júrgizdi.
İs-sharanyń negizgi maqsaty – 2025-2026 oqý jylynyń eki semestrin qamtyǵan uzaqmerzimdi óndiristik is-tájirıbeniń nátıjelerin saralaý, bolashaq muǵalimderdiń kásibı quzyrettilik deńgeıin anyqtaý jáne ýnıversıtet pen mektep arasyndaǵy strategıalyq áriptestikti nyǵaıtý. Jıyn barysynda Abaı ýnıversıtetinde pedagogıkalyq tájirıbelerdiń bekitilgen akademıalyq kúntizbe negizinde joǵary deńgeıde júzege asyrylǵany erekshe atap ótildi.
Statısıkalyq málimetterge súıensek, 2025 jyldyń qyrkúıeginde ótken pedagogıkalyq praktıkaǵa 3-kýrs stýdentterinen 2 561 bilim alýshy qatysyp, Almaty qalasynyń 94 bilim berý uıymynda tájirıbe jınaqtaǵan. Osy kezeńde stýdentterge baǵyt-baǵdar bergen 1 176 mektep muǵalimine normatıvtik talaptarǵa saı tólem júrgizildi. Al 4-kýrs stýdentteriniń negizgi óndiristik is-tájirıbesi 22 aptaǵa sozylyp, 2025 jyldyń qazanynan 2026 jyldyń sáýirine deıingi kezeńdi qamtydy. Bul mańyzdy kezeńde barlyq fakúltetten 2 215 bilim alýshy mektepterde kásibı tájirıbeden ótti.
Tájirıbeniń geografıalyq aýqymy da keńeıip keledi. Máselen, sońǵy úsh jyldaǵy dástúr boıynsha 95 stýdent elordadaǵy 17 bilim berý uıymynda daǵdylaryn jetildirse, Almaty qalasynda 1 535 bilim alýshy 91 mektepke bólindi. Jalpy alǵanda, praktıka jumystaryna 108 bilim berý uıymy jumyldyryldy. Stýdentter 7-8 semestr aralyǵynda 8 860 ashyq sabaq ótkizip, teorıalyq bilimderin naqty oqý prosesinde nátıjeli ushtastyra bildi.
2019 jyldan beri Abaı ýnıversıteti engizgen bul biregeı bastamanyń tıimdiligi mektepter tarapynan júrgizilgen saýalnamalarmen rastaldy. Tájirıbeniń alǵashqy kezeńinde stýdentter mektep ortasyna beıimdelse, keıingi aılarda sabaq berý ádistemesin, BJB men TJB qurastyrýdy, sondaı-aq baǵalaý júıesin tolyq meńgerip shyqty. Osylaısha, úsh toqsandy qamtyǵan tájirıbe bolashaq muǵalimderdi eńbek naryǵyna daıyn, básekege qabiletti maman retinde qalyptastyrýǵa múmkindik berdi. Praktıka bazalaryndaǵy jetekshilerdiń 80 paıyzy pedagog-zertteýshi, pedagog-sheber jáne pedagog-sarapshy, 10 paıyzy pedagog-moderator sanatyndaǵy bilikti mamandar bolǵany stýdentterdiń kásibı ósýine oń yqpal etti. Atalǵan ustazdardyń jetekshiligimen 5 000-nan astam ashyq sabaq ótkizildi.
Sonymen qatar dýaldy oqytý júıesi de naqty jemisin berýde. Bıylǵy oqý jylynda 139 bilim alýshy osy júıe arqyly resmı jumysqa qabyldansa, 446 stýdent suranys hat negizinde tájirıbeden ótti. Konferensıa sońynda Basqarma tóraǵasy-rektordyń keńesshisi Haırýlla Janbekov, departament dırektory Almas Naımanbaev jáne mektep dırektorlary sóz sóılep, pedagog kadrlardy daıarlaýdaǵy jańa formattyń mańyzdylyǵyn qorytyndylady.
Jıyn barysynda Kásibı baǵdar jáne mansapty damytý departamentiniń dırektory Almas Naımanbaev praktıkanyń strategıalyq mańyzyna toqtalyp: «Uzaqmerzimdi pedagogıkalyq praktıka – tek akademıalyq talap emes, bul – bolashaq mamannyń mektep ómirine tolyqqandy enýine múmkindik beretin kásibı kópir. Bizdiń maqsatymyz — dıplom alǵan túlek jumys ornynda beıimdelýge ýaqyt joǵaltpaı, alǵashqy kúnnen bastap sapaly bilim berýine jaǵdaı jasaý», – dep atap ótti.
İs-shara «Meniń tájirıbedegi bir kúnim» baıqaýynyń jeńimpazdaryn marapattaýmen jáne «Úzdik tájirıbe jetekshilerine» alǵysqattar tabystaýmen aıaqtaldy. Bul shara Abaı ýnıversıtetiniń bilim men tájirıbeni sabaqtastyrýdaǵy júıeli jumysynyń aıqyn aıǵaǵyna aınaldy.
