Almaty ákimdigi janyndaǵy ÚEU-men yntymaqtastyq jónindegi keńestiń otyrysynda memleket pen azamattyq qoǵamnyń ózara is-qımylyn damytýdyń negizgi tásilderi talqylandy. Jıynda Jańa Konstıtýsıanyń erejelerin túsindirý, sondaı-aq «Taza Qazaqstan», «Zań men tártip» jáne «Adal azamat» ıdeologıalyq bastamalaryn ilgeriletý máselesine aıryqsha nazar aýdaryldy, - dep habarlaıdy alnews.
Kezdesý barysynda úkimettik emes uıymdardyń qoǵamdyq tyńdaýlarǵa qatysýy, áleýmettik ınovasıalardy damytý jáne jumystyń jańa formattaryn engizý máseleleri qaraldy. ÚEU-nyń konstıtýsıalyq reformalardyń mánin halyqqa túsindirýde jáne azamattyq jaýapkershilik mádenıetin qalyptastyrýda mańyzdy ról atqaratyny atap ótildi.
Otyrysty ashqan Almaty qalasy ákiminiń orynbasary Abzal Núkenov azamattyq sektordyń strategıalyq mańyzyn atap ótti:
"Almatynyń azamattyq sektory qoǵam men memleket arasyndaǵy mańyzdy baılanystyrýshy býyn. Memleket úshin bul – ortaq mindetterdi sheshýdegi laıyqty ári teń seriktes", – dedi ol.
Sondaı-aq ol byltyr Memleket basshysy azamattyq qoǵamdy damytý, áleýmettik jaýapkershilikti kúsheıtý jáne memlekettiń halyqpen ózara is-qımylyn nyǵaıtý baǵyttaryn aıqyndaıtyn İshki saıasat tujyrymdamasyn bekitkenin eske saldy. Atalǵan qujatqa negizgi ıdeologıalyq baǵdarlar engizilgen.
Atap aıtqanda, «Taza Qazaqstan» bastamasy ekologıalyq jaýapkershilikti ilgeriletip, azamattardyń abattandyrý men qorshaǵan ortany qorǵaýǵa qatysýynyń jańa mádenıetin qalyptastyrady. Bul bastama ár adamnyń jeke tártibine, ÚEU men azamattyq sektordyń belsendi aralasýyna mán beredi jáne ulttyq qundylyqtar men áleýmettik mańyzy bar baǵdarlamalarmen sabaqtasyp jatyr.
«Zań men tártip» ıdeologemasy zań ústemdigi men qoǵamdyq tártip qaǵıdatyn ornyqtyryp, azamattar men memlekettik organdar arasynda quqyqtyq mádenıet, tártip pen jaýapkershilikti qalyptastyrady. Ony iske asyrýdaǵy mańyzdy tetik – ÚEU bastamalary, volonterlik baǵdarlamalar men azamattyq sektor jobalary arqyly qoǵamnyń belsendi qatysýy. Bul zańǵa baǵyný mádenıetin nyǵaıtýǵa, halyqqa quqyqtary men mindetterin túsindirýge, sondaı-aq qoǵamdyq normalar men erejelerdi qurmetteý daǵdysyn qalyptastyrýǵa yqpal etedi.
İshki saıasattyń kelesi qaǵıdaty – «Adal azamat». Bul bastama azamattardyń boıynda adaldyq, uqyptylyq jáne jeke jaýapkershilik qaǵıdattaryn qalyptastyrýǵa baǵyttalǵan. Ony júzege asyrý úshin ÚEU bastamalary, bilim berý jáne aǵartýshylyq baǵdarlamalar arqyly qoǵamdy keńinen tartý qajet.
Osylaısha, atalǵan bastamalar men qaǵıdattardyń toǵysýy memleket, qoǵam jáne árbir azamat ádil, ornyqty ári úılesimdi damý jolynda birlese áreket etetin «Ádiletti Qazaqstandy» qurýdyń berik negizin qalaıdy.
Belgili bolǵandaı, respýblıkalyq referendýmda Qazaqstan Respýblıkasynyń Jańa Konstıtýsıasy qabyldandy. Qalanyń úkimettik emes uıymdary bul mańyzdy oqıǵaǵa belsendi qatysyp, memleket pen qoǵamnyń zamanaýı basymdyqtaryn aıqyndaıtyn jańartylǵan quqyqtyq negizdi qoldady. Jańa Konstıtýsıa eldiń odan ári damýyna, demokratıalyq ınstıtýttardy nyǵaıtýǵa, azamattardyń quqyqtary men bostandyqtaryn qorǵaýǵa, sondaı-aq memlekettik organdar jumysynyń ashyqtyǵy men jaýapkershiligin arttyrýǵa keń múmkindik beredi.
Abzal Núkenovtiń aıtýynsha, bul – tek qatań saqtalýy tıis negizgi qujat qana emes, sonymen birge ony halyq arasynda jan-jaqty túsindirý de asa mańyzdy.
"Túsindirý jumystaryn jalǵastyrý óte mańyzdy. Halyq óz quqyqtary men mindetterin, memlekettiń basymdyqtaryn, sondaı-aq qoǵam ómirine aralasýdyń mańyzyn túsinýi kerek. Konstıtýsıada memlekettik saıasattyń negizgi baǵyttary, sonyń ishinde quqyqtyq memleketti damytý, áleýmettik ádilettilikti qamtamasyz etý, azamattyq belsendilikti yntalandyrý jáne el ómirine yqpal etetin sheshimderdi qabyldaýǵa halyqty tartý máseleleri bekitilgen", – dep qosty ol.
Osylaısha, Jańa Konstıtýsıa quqyqtyq mádenıetti qalyptastyrýdyń, azamattardyń jaýapkershiligin arttyrýdyń jáne memlekettik ınstıtýttarǵa degen senimdi nyǵaıtýdyń irgetasyna aınalyp otyr. Árbir azamat onyń qaǵıdattarynyń qoǵamnyń kúndelikti ómiriniń ajyramas bóligine aınalýyna jáne memleket pen azamattardyń naqty is-áreketterinen kórinis tabýyna úles qosýy tıis.
Almaty qalasy İshki saıasat basqarmasynyń basshysy Aıdar Esenbekov naqty sheshimder qabyldaý úderisine ÚEU qatysýyn keńeıtýdiń mańyzyn atap ótti:
"Almaty – kúrdeli ári kópqabatty qala. Ár aýdannyń óz ereksheligi, óz máselesi bar. Sondyqtan turǵyndarmen tikeleı jumys isteıtin ÚEU men sarapshylardyń rólin kúsheıtý biz úshin óte mańyzdy", – dedi ol.
Basym baǵyttardyń qatarynda rásimderdiń ashyqtyǵyn arttyrý, ózara is-qımyldy sıfrlandyrý, sondaı-aq áleýmettik jobalaýǵa jáne tıimdilikti baǵalaýǵa qatysty ÚEU-ǵa arnalǵan bilim berý baǵdarlamalaryn damytý máseleleri ataldy.
Almaty máslıhatynyń depýtaty Altynaı Kóbeeva azamattyq sektordyń sapalyq turǵydan kúsheıýine nazar aýdardy:
"Azamattyq sektor – tek áleýmettik jobalardy oryndaýshylar ǵana emes, sonymen qatar ıdeıa usynatyn jáne kásibı saraptama qalyptastyratyn orta", – dedi ol.
«Almaty Azamattyq Alliance» ZTB tóraǵasy Nurjan Jaqypov bastamalardy is júzinde júzege asyrýdyń mańyzyn atap ótti:
"Azamattyq sektor jumysynyń negizi – halyqpen turaqty baılanys arqyly qalyptasatyn senim", – dedi ol.
Otyrys qorytyndysy boıynsha ÚEU-nyń qoǵamdyq tyńdaýlar men áleýmettik jobalarǵa qatysýyn kúsheıtý, sondaı-aq Jańa Konstıtýsıa men memlekettik ıdeologıalyq bastamalar boıynsha júıeli aqparattyq-túsindirý jumystaryn keńeıtý josparlanyp otyr.
Kezdesý sońynda otyrys barysynda aıtylǵan negizgi bastamalar men usynystardy jınaqtap, aldaǵy jumystyń naqty baǵyttary men olardy iske asyrý tetikterin aıqyndaý mańyzdy ekeni atap ótildi.
