2026 jylǵy 15 sáýir kúni bastamashyl top jańa «Ádilet» saıası partıasyn qurý nıeti týraly resmı málimdeme jasady, - dep habarlaıdy alnews.
Jańa partıa ózin progresıvti reformalardyń jaqtaýshysy, Ádiletti Qazaqstandy qurý, zań ústemdigin nyǵaıtý jáne sheshim qabyldaý prosesine azamattardyń keńinen qatysýyn qamtamasyz etýdi qoldaýshy retinde tanytady.
«Ádilet» partıasynyń negizgi maqsaty men mindetteri – Jańa Konstıtýsıa qaǵıdattary men Ádiletti Qazaqstan qundylyqtary negizinde Qazaqstan Respýblıkasy azamattarynyń quqyqtaryn, bostandyqtary men múddelerin qorǵaý.
Jańa uıymnyń mısıasy – 2026 jylǵy 15 naýryzda ótken referendýmda qabyldanǵan jańa Konstıtýsıa erejeleriniń qatań saqtalýyn qamtamasyz etý. Jańa partıa progresıvti jastardy, túrli sala mamandaryn, qala men aýyl turǵyndaryn, ıaǵnı otandastarymyzdyń múddelerin shynaıy qorǵaýǵa jáne barshaǵa ortaq ádildikti ornatýǵa atsalysýǵa daıyn qazaqstandyqtardyń basyn biriktiredi.
«Biz ekonomıkasy qýatty, barshaǵa keń múmkindik beretin jáne álemdik qoǵamdastyqta abyroıly da bedeldi, Ádiletti memleket qurý jáne ony nyǵaıtýǵa múddeli barlyq azamattardyń kúsh-jigerin biriktirgimiz keledi», - dep málimdedi bastamashylar.
ÁDİLDİK, PATRIOTIZM, EŃBEKQORLYQ, JAÝAPKERSHİLİK jáne PROGRES qundylyqtaryna súıene otyryp, partıa bastamashylary mynadaı basymdyqtardy jarıalady:
- Barlyq qazaqstandyqtar úshin múmkindikter teńdigin qamtamasyz etý, klandyq, óńirlik erekshelikterdiń yqpalyn azaıtý;
- Táýelsiz, tıimdi ári obektıvti quqyq qorǵaý jáne sot júıesin nyǵaıtý;
- Ekonomıkalyq ádildik pen Qazaqstannyń turaqty damýy.
Jańa partıa óziniń saıası kún tártibin qalyptastyrý aıasynda azamattyq qoǵam ókilderi, sarapshylar jáne sala mamandarymen tyǵyz yqpaldasýǵa nıetti.
16 sáýirde bastamashy top Qazaqstan Respýblıkasynyń Ádilet mınıstrligine tirkeýge daıyndyq rásimin bastaý týraly ótinish jiberedi jáne jaqyn arada partıanyń quryltaı sezin ótkizýdi josparlady.
