2026 جىلعى 9 اقپاندا استانا قالاسىندا ۇلتتىق ۆولونتەرلىك جەلى «جاڭا كونستيتۋسيا جوباسىن تالقىلاۋ جانە قولداۋ» تاقىرىبىندا دوڭگەلەك ۇستەل وتكىزدى. ءىس-شاراعا ەلىمىزدىڭ بارلىق وڭىرلەرىنەن ۆولونتەرلىك ۇيىمداردىڭ وكىلدەرى، وڭىرلىك ۆولونتەرلىك فرونت-وفيستەر مەن باستاماشىل توپتار، سونداي-اق سەرىكتەستەر وفلاين جانە ونلاين فورماتتا قاتىستى.
كەزدەسۋ بارىسىندا ۆولونتەرلىك سەكتوردىڭ جاڭا كونستيتۋسيانى تالقىلاۋعا قاتىسۋى، ۇكىمەتتىك ەمەس ۇيىمداردىڭ حالىقتى اقپاراتتاندىرۋداعى ءرولى، قوعامدىق ديالوگتى دامىتۋ جانە مەملەكەتتىك ورگاندارمەن ءوزارا ءىس-قيمىل ماسەلەلەرى تالقىلاندى.
قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، كونستيتۋسيالىق رەفورما جونىندەگى كوميسسيا مۇشەسى، «ۇلتتىق ۆولونتەرلىك جەلى» زتب ءتوراعاسى كيم ۆەرا الەكساندروۆنا كونستيتۋسيا جوباسىن ازىرلەۋگە ازاماتتىق قوعامنىڭ قاتىسۋىنىڭ ماڭىزىن جانە كونستيتۋسيالىق كوميسسيا جۇمىسىنىڭ اشىقتىعىن اتاپ ءوتتى.
«كونستيتۋسيا قوعاممەن ديالوگ نەگىزىندە قالىپتاسۋدا، جابىق رەجيمدە ەمەس. جاڭا كونستيتۋسيا جوباسىمەن التى اي جۇمىس ىستەۋ بارىسىندا ازاماتتاردان، قوعامدىق ۇيىمداردان، ساياسي پارتيالاردان جانە ساراپشىلاردان شامامەن 4 مىڭ ۇسىنىس ءتۇستى. بۇل قوعامنىڭ ەندى ءپاسسيۆتى باقىلاۋشى ەمەس، ساياسي ۇدەرىستەردىڭ تولىققاندى قاتىسۋشىسىنا اينالىپ كەلە جاتقانىن بىلدىرەدى»، — دەدى ۆەرا كيم.
ونىڭ ايتۋىنشا، جاڭا كونستيتۋسيالىق ينستيتۋت — حالىق كەڭەسىن ەنگىزۋ قوعامدىق قاتىسۋدى نىعايتۋداعى ماڭىزدى قادام بولماق. «بۇل مەملەكەت پەن قوعام ستراتەگيالىق دامۋ باعىتتارىن بىرلەسىپ تالقىلايتىن مودەلگە كوشۋ. قوعام تەك تالقىلاۋ قۇقىعىنا عانا ەمەس، زاڭ شىعارۋ ۇدەرىسىنە رەسمي تۇردە باستامالار ەنگىزۋ مۇمكىندىگىنە يە بولادى»، — دەپ اتاپ ءوتتى ول.
كونستيتۋسيالىق رەفورما جونىندەگى كوميسسيا مۇشەسى، «اسسامبلەيا جاستارى» رقب ءتوراعاسى دجۋمۋربايەۆ تيمۋر گابدۋلوۆيچ جاڭا كونستيتۋسيانىڭ قازاقستان جاستارى ءۇشىن ەرەكشە ماڭىزىن اتاپ ءوتتى.
«قازاقستان جاستارى ءۇشىن جاڭا كونستيتۋسيانى قابىلداۋ — اسا ماڭىزدى قادام. ويتكەنى ونىڭ ماڭىزى بۇگىنگى جانە بولاشاق ۇرپاققا تىكەلەي باعىتتالعان. ادامعا باعدارلانۋ — جاستاردىڭ ءادىل ءارى قولجەتىمدى ءوسۋ جانە دامۋ مۇمكىندىكتەرىن اشاتىن جاڭا نەگىزگى زاڭنىڭ باستى لوگيكاسى»، — دەدى تيمۋر دجۋمۋربايەۆ.
ول سونداي-اق سىندارلى پاتريوتيزم، ادامي كاپيتالدى دامىتۋ، ءبىلىم مەن يننوۆاسيا قاعيداتتارىن بەكىتۋ جاستاردىڭ ءوزىن-وزى جۇزەگە اسىرۋ مۇمكىندىكتەرىن كەڭەيتىپ، ەل دامۋىنداعى ءرولىن كۇشەيتەتىنىن اتاپ ءوتتى.
ءوز كەزەگىندە «مەديسينالىق جاستار» رقب ءتوراعاسى، مەديسينا سالاسىنىڭ ۆولونتەرى ءابدىراش ابىلايحان ابدىكەرىم ۇلى كونستيتۋسيا جوباسىنىڭ الەۋمەتتىك جانە مەديسينالىق اسپەكتىلەرىنە توقتالدى.
«ۇسىنىلىپ وتىرعان كونستيتۋسيا جوباسى ادام ءومىرى مەن دەنساۋلىعىن مەملەكەتتىك ساياساتتىڭ وزەگىنە قويادى. وتباسىنى، انا مەن بالانى قورعاۋ، سونداي-اق دەنساۋلىق ساقتاۋ قۇقىعىن بەكىتۋ دەنساۋلىق ساقتاۋ جۇيەسىن دامىتۋ مەن قوعامدىق دەنساۋلىقتى نىعايتۋدىڭ بەرىك قۇقىقتىق نەگىزىن قالىپتاستىرادى»، — دەدى ابىلايحان ءابدىراش.
ونىڭ ايتۋىنشا، مەديسينالىق جاستار بۇل جوبانى ادامعا باعدارلانعان، الەۋمەتتىك جاۋاپتى مەملەكەت قالىپتاستىرۋ جولىنداعى ماڭىزدى قادام رەتىندە باعالايدى.
«جوبانىڭ تيىمدىلىگى ونىڭ ءىس جۇزىندە قالاي جۇزەگە اساتىنىنا تىكەلەي بايلانىستى. ءبىز بۇل نورمالار ناقتى باعدارلامالارمەن، جەتكىلىكتى قارجىلاندىرۋمەن جانە جاس ماماندار ءۇشىن قولايلى ەڭبەك جاعدايلارىمەن قامتاماسىز ەتىلەدى دەپ ۇمىتتەنەمىز»، — دەپ قوستى ول.
دوڭگەلەك ۇستەل اشىق تالقىلاۋ جانە ەركىن پىكىر الماسۋ فورماتىندا ءوتتى. شارا قورىتىندىسىندا ۇلتتىق ۆولونتەرلىك جەلى جاڭا كونستيتۋسيا جوباسىن قولداۋ جونىندەگى ۇندەۋدى جاريالادى
