ازاماتتار، قوعامدىق ۇيىمدار، عالىمدار مەن زاڭگەرلەر قاۋىمداستىعىنىڭ ءبىرقاتار ۇسىنىسى نەگىزىندە قازاقستانىڭ جاڭا كونستيتۋسياسىنىڭ جوباسىنا جاڭا ماڭىزدى تولىقتىرۋلار ەنگىزىلدى. ولاردى كونستيتۋسيالىق رەفورما جونىندەگى كوميسسيانىڭ ونىنشى وتىرىسىندا كونستيتۋسيالىق سوت ءتوراعاسىنىڭ ورىنباسارى باقىت نۇرمۇحانوۆ تانىستىردى.
ول كوميسسياعا ۆولونتەرلىك قىزمەتتى كونستيتۋسيالىق دەڭگەيدە بەكىتۋ تۋرالى ۇسىنىستار تۇسكەنىن حابارلادى. ناتيجەسىندە، قولدانىستاعى «ۆولونتەرلىك قىزمەت تۋرالى» زاڭدى جانە قوعامنىڭ دامۋى مەن قورشاعان ورتانى قورعاۋداعى ۆولونتەرلىكتىڭ ماڭىزدىلىعىن ەسكەرە وتىرىپ، ولار قولداۋ تاپقانىن مالىمدەدى.
«31-باپتىڭ 2-تارماعىندا قازاقستان رەسپۋبليكاسىندا ەرىكتى الەۋمەتتىك ساقتاندىرۋ، الەۋمەتتىك قامسىزداندىرۋدىڭ وزگە دە نىساندارىن قۇرۋ، ۆولونتەرلىك قىزمەت جانە قايىرىمدىلىقتىڭ ىنتالاندىرىلاتىنى جونىندە تولىقتىرۋ ەنگىزىلدى»، – دەدى كونستيتۋسيالىق سوت ءتوراعاسىنىڭ ورىنباسارى.
ول بۇل يدەيانى ىسكە اسىرۋ جاڭا كونستيتۋسيا جوباسىنىڭ باسقا ەرەجەلەرىن ۇيلەسىمدى تۇردە تولىقتىراتىنىن مالىمدەدى. اتاپ ايتقاندا، پرەامبۋلا مەن قازاقستان رەسپۋبليكاسىنىڭ تۇبەگەيلى قاعيداتتارىن، ونىڭ ىشىندە جاۋاپتى جانە جاسامپاز پاتريوتيزم يدەيالارىن ىلگەرىلەتۋ، ەڭبەكقورلىق قۇندىلىقتارىن بەكىتۋ جانە ت.ب.
باقىت نۇرمۇحانوۆ باسقا دا وزگەرىستەر قۇرىلتايدىڭ قىزمەتىن ۇيىمداستىرۋمەن بايلانىستى ەكەنىن ايتتى.
ماسەلەن، كوميتەتتەر مەن كوميسسيالاردىڭ قۇرىلۋ ءتارتىبى، وكىلەتتىكتەرى، قىزمەتىن ۇيىمداستىرۋدى زاڭمەن ايقىندايتىن جوبانىڭ 59-بابىنىڭ 3-تارماعىن الىپ تاستاۋدى ۇسىندى.
ول قازىرگى ۋاقىتتا جوعارى وكىلدى ورگاننىڭ كوميتەتتەرى مەن كوميسسيالارىنىڭ قىزمەتى ماسەلەلەرى «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» كونستيتۋسيالىق زاڭمەن، «ق ر پارلامەنتىنىڭ كوميتەتتەرى مەن كوميسسيالارى تۋرالى» زاڭمەن، پارلامەنت پەن ونىڭ پالاتالارىنىڭ رەگلامەنتتەرىمەن رەتتەلەتىنىن ەسكە سالدى.
«بۇل تۇزەتۋ اتالعان كونستيتۋسيالىق زاڭدا وسى ماسەلەلەردى قامتۋعا جانە ولاردى قۇقىقتىق رەتتەۋ دەڭگەيىن ارتتىرۋعا مۇمكىندىك بەرەدى»، – دەپ اتاپ ءوتتى باقىت نۇرمۇحانوۆ.
ول سونداي-اق كونستيتۋسيا جوباسىنىڭ مەملەكەتتىك جانە ورىس تىلدەرىندەگى ماتىندەرىن جەتىلدىرۋ جۇمىستارى جالعاسىپ جاتقانىن حابارلادى.
باقىت نۇرمۇحانوۆتىڭ ايتۋىنشا، جۇمىس توبى قۇقىقتىق نورمالار مازمۇنىنىڭ قولجەتىمدىلىگى مەن تۇسىنىكتىلىگىن قامتاماسىز ەتۋ ءۇشىن تۇجىرىمداردى وڭتايلاندىرۋ بويىنشا شارالار قابىلداۋدا. بۇل رەتتە جوبالاردىڭ تەرمينولوگيالىق جانە سەمانتيكالىق ءبىرىڭعايلىعىن قامتاماسىز ەتۋگە ەرەكشە نازار اۋدارىلۋدا.
اتاپ ايتقاندا، ۇكىمەت، پارلامەنت، پرەزيدەنت اكىمشىلىگى، كونستيتۋسيالىق كوميسسيانىڭ رەداكسيالىق-تەرمينولوگيالىق جۇمىس توبى، «قازاق ءتىلى» حالىقارالىق قوعامى ماماندارى مەن جۇمىسقا تارتىلعان لينگۆيستەردىڭ ۇسىنىستارى نەگىزىندە جەكەلەگەن رەداكسيالىق جانە ستيليستيكالىق تۇزەتۋلەر جۇزەگە اسىرىلدى.
