الماتىدا «تازا قازاقستان» رەسپۋبليكالىق باعدارلاماسى اياسىندا GREEN UP ەكولوگيالىق جوباسى باستالدى، - دەپ حابارلايدى alnews.
باستامانىڭ تانىستىرىلىمى 31 تامىزدا قالاداعى №224 مەكتەپتە ءوتتى. جوبا ECO Network قاتىسۋىمەن، قالانىڭ ەكولوگيا جانە قورشاعان ورتا باسقارماسى مەن Eco Almaty قولداۋىمەن جۇزەگە اسىرىلىپ وتىر.
GREEN UP جوباسى وقۋشىلار مەن ولاردىڭ وتباسىلارىندا قالدىقتى بولەك جيناۋ، جاۋاپتى تۇتىنۋ جانە تابيعي رەسۋرستارعا ۇقىپتى قاراۋ سەكىلدى ەكولوگيالىق ادەتتەردى قالىپتاستىرۋعا باعىتتالعان.
العاشقى پيلوتتىق جوبا بوستاندىق اۋدانىندا قولعا الىنعان. Green APP Almaty باعدارلاماسى اياسىندا اۋدانداعى بالاباقشالار، مەكتەپتەر مەن كوللەدجدەردى بىرىكتىرۋ جوسپارلانعان. ماركوۆ كوشەسى، 44 مەكەنجايىنداعى جانە Satbayev University-دەگى ەكو-حابتار، سونداي-اق econetwork.me سيفرلىق پلاتفورماسى باستامانىڭ نەگىزىنە اينالدى.
قاتىسۋشىلار قايتالاما شيكىزاتتى ۇيدە جيناپ، ەكو-حابتارعا تاپسىرا الادى. ناتيجە ءموبيلدى قوسىمشادا تىركەلىپ، ءبىلىم بەرۋ ۇيىمدارىنىڭ جالپى رەيتينگىندە ەسكەرىلەدى. سونداي-اق، ەكولوگيالىق اكسيالار مەن ەرىكتىلىك ءىس-شارالارعا قاتىسقانى ءۇشىن ۇپاي جيناۋعا بولادى.
№224 مەكتەپتىڭ ديرەكتورى رايزا احمەتوۆا ەكولوگيالىق ادەتتەردى ەرتە جاستان قالىپتاستىرۋدىڭ ماڭىزىن اتاپ ءوتتى.
«ءبىزدىڭ ماقساتىمىز – وقۋشىلاردىڭ ەكولوگيالىق مادەنيەتىن قالىپتاستىرىپ، قورشاعان ورتاعا جاۋاپكەرشىلىكپەن قاراۋدى كۇندەلىكتى ادەتكە اينالدىرۋ. بالانىڭ تابيعاتتى قورعاۋ قاجەتتىگىن ءبىلىپ قانا قويماي، ءوزىنىڭ ىس-ارەكەتى ارقىلى ونى ساقتاۋعا ناقتى ۇلەس قوسا الاتىنىن ءتۇسىنۋى ماڭىزدى»، – دەدى رايزا احمەتوۆا.
تانىستىرىلىم بارىسىندا وقۋشىلارعا قالدىقتى قالاي دۇرىس سۇرىپتاۋ كەرەكتىگى جانە قانداي ماتەريالداردىڭ قايتا وڭدەۋگە قابىلداناتىنى كورسەتىلدى. وقۋشىلار ماكۋلاتۋرا مەن پلاستيك قالدىقتارىن دا اكەلىپ، قايتا وڭدەۋگە تاپسىردى.
جوبا اۆتورى ەۆگەنيي مۇحامەدجانوۆ ەكولوگيالىق ادەت تاجىريبە جانە بۇكىل وتباسىنىڭ اتسالىسۋى ارقىلى ءتيىمدى قالىپتاساتىنىن جەتكىزدى.
«ەكولوگيالىق مادەنيەت ادامنىڭ كۇندەلىكتى قاراپايىم ارەكەتىنەن باستالادى. ەگەر بالا ۇيدە قالدىقتى سۇرىپتاپ، ولاردى قايتا وڭدەۋگە تاپسىرسا، ۋاقىت وتە كەلە بۇل ىسكە بۇكىل وتباسى قوسىلادى. ءبىزدىڭ مىندەتىمىز – ەكولوگيالىق جاۋاپتى ارەكەتتى تۇسىنىكتى، قولجەتىمدى ءارى قىزىقتى ەتۋ»، – دەدى ەۆگەنيي مۇحامەدجانوۆ.
الداعى ۋاقىتتا قاتىسۋشىلار ەكولوگيالىق كلۋبتار قۇرىپ، باستامالارىن ۇسىنىپ، قالا تابيعاتىن قورعاۋ اكسيالارىنا قاتىسا الادى. سونداي-اق، مەكتەپ وقۋشىلارىنا، كوللەدج ستۋدەنتتەرىنە، اتا-انالار مەن ءبىلىم بەرۋ ۇيىمدارىنىڭ قىزمەتكەرلەرىنە ارنالعان ەرىكتىلىك باعدارلاما قاراستىرىلعان.
جوبادا ىنتالاندىرۋ تەتىگى دە قاراستىرىلعان. بەلسەندى قاتىسۋشىلار مەن ءبىلىم بەرۋ ۇيىمدارى جانە قايتالاما شيكىزاتتىڭ بەلگىلى ءبىر تۇرلەرىن جيناعانى ءۇشىن ماراپاتتالادى. بولاشاقتا بۇل ۇلگىنى الماتىنىڭ باسقا اۋداندارىنا دا ەنگىزۋ جوسپارلانىپ وتىر.
GREEN UP ەكولوگيالىق اعارتۋدى، سيفرلىق قۇرالدار مەن ناقتى ىس-ارەكەتتەردى ۇشتاستىرا وتىرىپ، قالدىقتارعا جاۋاپكەرشىلىكپەن قاراۋدى كۇندەلىكتى ءومىردىڭ ءبىر بولىگىنە اينالدىرۋدى كوزدەيدى.
