الماتىدا قالا اكىمدىگىنىڭ قولداۋىمەن ۇيىمداستىرىلعان Almaty Summer Fest فەستيۆالىنىڭ العاشقى ماۋسىمى اياقتالدى، - دەپ حابارلايدى alnews.
جاز بويى الاتاۋ اۋدانىنداعى «الاتاۋ» ءداستۇرلى ونەر تەاترىنىڭ الاڭىندا اشىق اسپان استىندا 13 كونسەرت ءوتتى.
باعدارلامانىڭ ءبىر بولىگى مەملەكەتتىك مەرەكەلەر مەن كورنەكتى مادەنيەت قايراتكەرلەرىنىڭ شىعارماشىلىعىنا ارنالدى. جوبا اياسىندا دومبىرا كۇنىنە، استانا كۇنىنە، اباي كۇنىنە ارنالعان ءىس-شارالار، سونداي-اق ءشامشى قالداياقوۆتىڭ تۋعان كۇنىنە وراي مۋزىكالىق كەش ۇيىمداستىرىلدى.
ساحنادا دوس-مۇقاسان، روزا رىمبايەۆا، ماقپال ءجۇنىسوۆا، ءمادينا ءسادۋاقاسوۆا، قايرات نۇرتاس، MuzArt، جانار دۇعالوۆا، ميراس جۇگىنىسوۆ، Kalifarniya، Turar، Alem، Bayansulu، سادراددين، ەركە ەسماحان، نۇرجان كەرمەنبايەۆ جانە باسقا دا ونەرپازدار ونەر كورسەتتى.
فەستيۆال اياسىندا ەكولوگيا تاقىرىبىنا دا ەرەكشە ءمان بەرىلدى. كونسەرت بارىسىندا «تازا قازاقستان» اكسياسىنىڭ قۇندىلىقتارى ناسيحاتتالىپ، ءىس-شارالار اياقتالعان سوڭ كورەرمەندەر اۋماق تازالىعىن ساقتاۋعا شاقىرىلدى.
جاز بويى جوباعا 300-دەن استام ونەرپاز قاتىسىپ، 1 مىڭنان استام ءان شىرقالدى. كونسەرتتەردى 250 مىڭنان استام كورەرمەن تاماشالادى، ال فەستيۆال تۋرالى الەۋمەتتىك جەلىلەردە جاريالانعان ماتەريالداردىڭ جالپى قارالىمى 50 ميلليوننان استى.
Almaty Summer Fest مادەني ءىس-شارالاردىڭ قولجەتىمدىلىگىن ارتتىرۋعا جانە قالا تۇرعىندارى مەن قوناقتارىنىڭ جازعى دەمالىسىن مازمۇندى وتكىزۋگە باعىتتالدى.
