الماتىدا بالالار مەن جاسوسپىرىمدەردىڭ بوس ۋاقىتىن ءتيىمدى ۇيىمداستىرۋعا باعىتتالعان تۇرعىلىقتى جەرى بويىنشا دەمالىس ورتالىقتارى جۇمىسىن جالعاستىرۋدا. مۇندا جاسوسپىرىمدەر سپورتپەن، شىعارماشىلىقپەن، زياتكەرلىك باعىتتارمەن اينالىسىپ، جاڭا داعدىلاردى تەگىن مەڭگەرە الادى.
بۇگىندە قالادا 100 دەمالىس ورتالىعى جۇمىس ىستەيدى. ولارعا 13 مىڭنان استام تاربيەلەنۋشى تۇراقتى قاتىسادى. ورتالىقتاردا سپورت، شاحمات، حورەوگرافيا، ۆوكال، بەينەلەۋ ونەرى، IT جانە باسقا دا باعىتتار بويىنشا 300-دەن استام تەگىن ۇيىرمە مەن سەكسيا قاراستىرىلعان.
دەمالىس ورتالىقتارىنىڭ باستى ەرەكشەلىگى - ولاردىڭ تۇرعىلىقتى جەرگە جاقىن ءارى قولجەتىمدى بولۋى. جاسوسپىرىمدەر بوس ۋاقىتىن پايدالى وتكىزىپ قانا قويماي، ءوز قابىلەتتەرىن دامىتىپ، جاڭا ورتا قالىپتاستىرىپ، ءتۇرلى باعىتتا ءوزىن سىناپ كورۋگە مۇمكىندىك الادى.
«مەن دەمالىس ورتالىعىنا وزىمە قىزىقتى باعىتپەن اينالىسۋ ءۇشىن كەلدىم. كەيىن مۇندا جاڭا دوستار تاپتىم. ءبىز بىرگە جاتتىعىپ، ءتۇرلى ءىس-شارالار مەن جارىستارعا قاتىسامىز. مۇندا ءارتۇرلى باعىتتى بايقاپ، وزىڭە شىنىمەن نە ۇنايتىنىن تۇسىنۋگە بولادى»، - دەيدى الماتىداعى دەمالىس ورتالىقتارىنىڭ ءبىرىنىڭ تاربيەلەنۋشىسى.
ورتالىقتاردىڭ جۇمىسىندا بالالار مەن جاسوسپىرىمدەردىڭ بوس ۋاقىتىن ۇيىمداستىرۋمەن قاتار، تاربيەلىك باعىتقا دا ەرەكشە كوڭىل بولىنەدى. كوماندالىق جۇمىس، سپورت، شىعارماشىلىق جانە قوعامدىق باستامالار ارقىلى ولاردىڭ بويىندا جاۋاپكەرشىلىك، ءتارتىپ، ءوزارا قۇرمەت پەن دامۋعا دەگەن ۇمتىلىس قالىپتاسادى.
جىل سايىن دەمالىس ورتالىقتارىنىڭ بازاسىندا 1000-نان استام ءىس-شارا وتكىزىلەدى. ولاردىڭ قاتارىندا قالالىق جانە اۋداندىق تۋرنيرلەر، بايقاۋلار، فەستيۆالدەر، شەبەرلىك ساباقتارى، شىعارماشىلىق كەزدەسۋلەر جانە باسقا دا باستامالار بار.
وسىلايشا، دەمالىس ورتالىقتارى الماتىداعى بالالار مەن جاسوسپىرىمدەردىڭ قابىلەتىن اشۋعا، بوس ۋاقىتىن ءتيىمدى وتكىزۋگە جانە جان-جاقتى دامۋىنا مۇمكىندىك بەرەتىن قولجەتىمدى ورتا قالىپتاستىرۋدا.
