الماتىدا جاڭا وقۋ جىلىنا قاراي ستۋدەنتتەر ءۇشىن جاتاقحانالاردا، حوستەلدەردە جانە قوناق ۇيلەردە 61،2 مىڭ ورىن دايىندالادى. سونىمەن قاتار سوڭعى ءبىر جىلدا ستۋدەنت جاتاقحانالارىنداعى ورىن تاپشىلىعى ءتورت ەسەگە جۋىق — 23،7 مىڭنان 5،7 مىڭ ورىنعا دەيىن قىسقارعان، - دەپ حابارلايدى alnews.
قالادا باسقا وڭىرلەردەن كەلگەن ستۋدەنتتەردى ورنالاستىرۋعا قالاي دايىندالىپ جاتقانى تۋرالى الماتى قالاسىنىڭ وڭىرلىك كوممۋنيكاسيالار قىزمەتىندە وتكەن بريفينگتە قالالىق جاستار ساياساتى باسقارماسىنىڭ باسشىسى ازيز كاجدەنبەك ايتىپ بەردى.
الماتى ەلىمىزدىڭ ەڭ ءىرى ءبىلىم بەرۋ ورتالىعى بولىپ قالا بەرەدى. ءقازىر قالاداعى 35 جوعارى وقۋ ورنىندا 221 مىڭ ستۋدەنت ءبىلىم الادى، ونىڭ 149 مىڭى باسقا وڭىرلەردەن كەلگەن جاستار. ازيز كاجدەنبەكتىڭ ايتۋىنشا، ستۋدەنتتەرگە ارنالعان تۇرعىن ۇيگە دەگەن سۇرانىس ارتىپ كەلەدى. 2026 جىلى 30 094 مەملەكەتتىك ءبىلىم بەرۋ گرانتى ءبولىندى. بۇل وتكەن جىلمەن سالىستىرعاندا 700-گە، ال 2024 جىلمەن سالىستىرعاندا 1 600-گە كوپ. سونىمەن قاتار جوعارى وقۋ ورىندارىنىڭ اقىلى بولىمدەرىنە قۇجات قابىلداۋ 28 تامىزعا دەيىن جالعاسادى. سوندىقتان ستۋدەنتتەردىڭ ناقتى سانى ءالى دە ناقتىلانىپ جاتىر.
«ءبىز ءقازىردىڭ وزىندە سۇرانىستى ەسكەرە وتىرىپ، دايىندىق جۇمىستارىن جۇرگىزىپ جاتىرمىز. سوڭعى ءبىر جىلدا جاتاقحانالارداعى ورىن تاپشىلىعى ءتورت ەسەگە جۋىق قىسقاردى. ءقازىر الماتىدا 136 ستۋدەنتتىك جاتاقحانا جۇمىس ىستەيدى. ونىڭ 43ء-ى 2023 جىلدان بەرى پايدالانۋعا بەرىلگەن، ال بىلتىر رەكوردتىق 4،5 مىڭ ورىن ىسكە قوسىلدى. بۇگىندە جاتاقحانالاردا 46،2 مىڭ ستۋدەنت تۇرادى. بۇل وتكەن جىلمەن سالىستىرعاندا 6 مىڭعا كوپ. 2026 جىلدىڭ سوڭىنا دەيىن قالادا تاعى 13 نىساندى ىسكە قوسۋ جوسپارلانىپ وتىر، ولاردا 4 658 ورىن بولادى. سونىمەن قاتار قالا بالاما تۇرعىن ءۇي قورىن دا كەڭەيتىپ جاتىر. ستۋدەنتتەر ءۇشىن حوستەلدەر مەن قوناق ۇيلەردە 11 مىڭ ورىن قاراستىرىلعان. قوسىمشا رەزەرۆتەردى جوعارى وقۋ ورىندارىنىڭ وزدەرى دە ىزدەستىرىپ جاتىر. 1 قىركۇيەككە دەيىن الماتىدا جالپى 61،2 مىڭ ورىن دايىن بولادى. وعان جاتاقحانالار، حوستەلدەر، قوناق ۇيلەر جانە جوعارى وقۋ ورىندارىنىڭ ىشكى رەزەرۆتەرى كىرەدى»، — دەدى ازيز كاجدەنبەك.
جاڭا جاتاقحانالار سالۋ دا ماڭىزدى باعىتتاردىڭ ءبىرى بولىپ وتىر. بۇل ىسكە ينۆەستورلار تارتىلادى. 2023 جىلدان باستاپ اكىمدىك باستاماسىمەن الماتىدا جوبالىق كەڭسە جۇمىس ىستەيدى. ونىڭ ماماندارى ينۆەستورلارعا قولداۋ كورسەتىپ، رۇقسات قۇجاتتارىن راسىمدەۋگە جانە ستۋدەنتتىك جاتاقحانالار قۇرىلىسىنا الىنعان نەسيەلەر بويىنشا پايىزدىق مولشەرلەمەلەردى سۋبسيديالاۋ تەتىكتەرىن تۇسىنۋگە كومەكتەسەدى.
ستۋدەنتتەر جاپپاي قونىستاناتىن كەزەڭدە قالاداعى كەڭەس بەرۋ ورتالىقتاردىڭ جۇمىسى دا كۇشەيتىلدى. 10 تامىزدان باستاپ قازاق ۇلتتىق قىزدار پەداگوگيكالىق ۋنيۆەرسيتەتىنىڭ بازاسىندا بوگەنباي باتىر كوشەسى، 142 مەكەنجايىندا احۋالدىق ورتالىق جۇمىس ىستەيدى. ونىڭ جانىندا تاۋلىك بويى جۇمىس ىستەيتىن بايلانىس ورتالىعى بار. وعان تاۋلىگىنە 1،5 مىڭنان استام قوڭىراۋ تۇسەدى. كەڭەس الۋ ءۇشىن مىنا تەلەفوندارعا حابارلاسۋعا بولادى: +7 700 950 95 28، +7 727 237 01 70.
ستۋدەنتتەرگە قاي جەردە ورنالاسۋعا بولاتىنى، جاتاقحاناعا قالاي ءوتىنىش بەرۋ كەرەكتىگى، ورىن بەرىلمەگەن جاعدايدا نە ىستەۋ قاجەتتىگى جانە قيىن جاعداي تۋىنداعاندا قايدا جۇگىنۋ كەرەكتىگى تۇسىندىرىلەدى. وسىنداي ورتالىقتار الماتىداعى بارلىق جوعارى وقۋ ورنىندا جۇمىس ىستەيدى.
تاعى ءبىر شارا - قونىستانۋ كۇندەرى قانداي دا ءبىر سەبەپپەن باسپاناسىز قالعان ستۋدەنتتەرگە ۋاقىتشا تۇرعىن ءۇي ۇسىنۋ. 22 تامىزدا ماۋلەنوۆ كوشەسى، 108ا مەكەنجايىنداعى ALT ۋنيۆەرسيتەتىنىڭ №1 ستۋدەنتتەر ۇيىندە 50 ورىندىق داعدارىس ورتالىعى اشىلادى.
«ەگەر ستۋدەنت قونىستانۋ كۇنى قانداي دا ءبىر سەبەپپەن باسپاناسىز قالسا، ەلەۋسىز قالدىرمايمىز. ونى ۋاقىتشا ورنالاستىرىپ، كەيىن تۇراقتى تۇراتىن جەرىن تابۋعا كومەكتەسەمىز»، — دەدى ازيز كاجدەنبەك.
ستۋدەنتتىك جاتاقحانالارعا قونىستانۋ 25 تامىزدا باستالادى. ال جوعارى وقۋ ورىندارىنداعى وقۋ ۇدەرىسى 1 قىركۇيەكتە باستالادى. وسى كەزەڭدە قالاداعى بارلىق جاۋاپتى قىزمەتتەر كۇشەيتىلگەن جۇمىس رەجيمىنە كوشەدى. بۇل رەتتە قالادا تەك بوس ورىنداردىڭ سانى عانا ەمەس، ستۋدەنتتەردىڭ تۇرۋ جاعدايى دا باقىلاۋدا بولادى. جىل سايىن جاتاقحانالار ەكى كەزەڭ بويىنشا تەكسەرىلەدى. وعان قوعام وكىلدەرى، دەپۋتاتتار، ۇكىمەتتىك ەمەس ۇيىمدار جانە ەرىكتىلەر قاتىسادى.
بيىل مونيتورينگتىڭ ءبىرىنشى كەزەڭى 30 ماۋسىم مەن 3 شىلدە ارالىعىندا ءوتتى. تەكسەرۋ ناتيجەسىندە ءبىرقاتار نەگىزگى كەمشىلىك انىقتالدى: بولمەلەردەگى ىلعالدىلىق، جيھازداردىڭ توزۋى، سۋ اعۋى جانە سانتەحنيكاداعى اقاۋلار، تەرەزەلەر مەن ەسىكتەردىڭ جاعدايى، سونداي-اق جاتاقحانالاردى كوركەيتۋ جانە كۇتىپ ۇستاۋعا قاتىستى ماسەلەلەر. ءاربىر انىقتالعان كەمشىلىك بويىنشا جوعارى وقۋ ورىندارىنا ءتيىستى ۇسىنىستار بەرىلدى. ءقازىر كەمشىلىكتەر بەكىتىلگەن كەستەگە سايكەس جويىلىپ جاتىر. ودان كەيىن قايتا مونيتورينگ جۇرگىزىلەدى.
«ءبىز ءۇشىن قاجەتتى ورىن سانىن قامتاماسىز ەتۋ عانا ماڭىزدى ەمەس. ستۋدەنتتەردىڭ قانداي جاعدايدا تۇراتىنى ودان كەم ەمەس ماڭىزدى. جاتاقحانالاردىڭ جاعدايىنا قاتىستى بىردە-بىر ەسكەرتۋ نازاردان تىس قالمايدى»، — دەدى سپيكەر.
جاستار ساياساتى باسقارماسى وكىلدەرىنىڭ مالىمەتىنشە، قازىرگى ۋاقىتتا الماتىدا ستۋدەنتتەردى ورنالاستىرۋ ماسەلەسى باقىلاۋدا. قالا باسشىلىعى وسى وقۋ جىلىنداعى قاجەتتىلىكتى تولىق قامتاماسىز ەتىپ قانا قويماي، الداعى جىلدارى ستۋدەنتتەر سانىنىڭ ءوسۋى مەن تۇرعىن ۇيگە دەگەن سۇرانىستى الدىن الا ەسكەرۋگە مۇمكىندىك بەرەتىن جۇيە قالىپتاستىرۋدى جوسپارلاپ وتىر.
