كونستيتۋسيالىق كوميسسيانىڭ ەكىنشى وتىرىسىندا قازاقستان رەسپۋبليكاسىنىڭ كونستيتۋسياسىنا وزگەرىستەر مەن تولىقتىرۋلار ەنگىزۋ جونىندەگى ۇسىنىستاردى كەزەڭ-كەزەڭمەن تالقىلاۋ باستالدى، - دەپ حابارلايدى alnews.
وتىرىستىڭ بارىسىندا قازاقستان رەسپۋبليكاسى پارلامەنتى ءماجىلىسىنىڭ دەپۋتاتى سنەجاننا يماشيەۆا ءبىرىنشى وتىرىس قورىتىندىسى بويىنشا دايىندالعان سالىستىرمالى كەستەنى تانىستىرىپ، پرەامبۋلا مەن 1–39 باپتاردى جۇيەلى تۇردە قاراۋدى ۇسىندى.
ۇسىنىلعان وزگەرتۋلەر كونستيتۋسيالىق قۇرىلىمنىڭ نەگىزدەرىن ناقتىلاۋ جانە نىعايتۋعا، نورمالاردىڭ قۇقىقتىق انىقتىعىن ارتتىرۋعا، سونداي-اق قۇقىق قورعاۋ مەحانيزمدەرىن كۇشەيتۋگە باعىتتالعانى ايتىلدى. ارنايى نازار پرەامبۋلانىڭ ءمان-ماعىناسىنا جانە قازىرگى الەۋمەتتىك ۇردىستەردى ەسكەرە وتىرىپ، كونستيتۋسيالىق نورمالاردى جاڭارتۋ قاجەتتىلىگىنە اۋدارىلدى.
«كونستيتۋسيانىڭ پرەامبۋلاسى — بۇل تەك كىرىسپە ەمەس، نەگىزگى زاڭنىڭ يدەيالىق-مورالدىق وزەگى، ماقساتتى ايقىندايتىن جانە مەملەكەتتىڭ دامۋ باعىتىن بەلگىلەيتىن نەگىزگى باعدار»، — دەدى سنەجاننا يماشيەۆا.
ودان كەيىنگى تالقىلاۋ كونستيتۋسيانىڭ I جانە II بولىمدەرىندەگى نورمالارعا قاتىستى بولدى، سونىڭ ىشىندە قۇقىقتىق جانە زايىرلى مەملەكەت پرينسيپتەرىن بەكىتۋ، ادام ءقادىر-قۇقىعىن، ءومىر ءسۇرۋ قۇقىعىن، جەكە ەركىندىك پەن تۇلعانىڭ قاۋىپسىزدىگىن قورعاۋ، سونداي-اق جەكە ءومىر مەن جەكە دەرەكتەردى قورعاۋ ماسەلەلەرى قارالدى. سونىمەن قاتار كونستيتۋسيالىق پرينسيپتەردىڭ نورماتيۆتىك مارتەبەسىن كۇشەيتۋ جانە ولاردىڭ پراكتيكالىق قولدانىلۋىن قامتاماسىز ەتۋ جونىندەگى ۇسىنىستار تالقىلاندى.
«ۇسىنىلىپ وتىرعان وزگەرىستەر كونستيتۋسيالىق نورمالاردىڭ قولدانىلۋ تيىمدىلىگىن ارتتىرۋعا جانە ولاردىڭ تۇسىندىرىلۋىنە ءبىرتۇتاس ءتاسىل قالىپتاستىرۋعا باعىتتالعان»، — دەپ ايتىلدى وتىرىس بارىسىندا.
سونىمەن قاتار، ادامي كاپيتالدى، ءبىلىم بەرۋدى، عىلىم مەن مادەنيەتتى دامىتۋ، الەۋمەتتىك كەپىلدىكتەردى كۇشەيتۋ، قورشاعان ورتانى قورعاۋ جانە وتباسىنىڭ قۇقىقتارىن ساقتاۋ سياقتى باستامالار قارالدى. ۇسىنىستاردى قاراۋ كەزەڭ-كەزەڭىمەن جۇزەگە اسىرىلاتىن بولادى جانە كونستيتۋسيالىق كوميسسيانىڭ كەلەسى وتىرىستارىندا جالعاسادى.
