شىمكەنت قالاسىندا ەرەكشە ءبىلىم بەرۋ قاجەتتىلىگى بار بالالارعا ارنالعان زاماناۋي جاتاقحانا پايدالانۋعا بەرىلدى. نىسان زاڭسىز شىعارىلعان اكتيۆتەردى قايتارۋدان تۇسكەن قارجى ەسەبىنەن سالىنعان، دەپ حابارلايدى alnews.
شىمكەنتتە مەديسينالىق كورسەتكىشتەرى بويىنشا ەرەكشە ءبىلىم بەرۋ قاجەتتىلىگى بار بالالار وقيتىن مەكتەپ-ينتەرنات تاربيەلەنۋشىلەرىنە ارنالعان جاڭا جاتاقحانا اشىلدى. بۇل تۋرالى باس پروكۋرور بەرىك اسىلوۆ مالىمدەدى.
ونىڭ ايتۋىنشا، بۇعان دەيىن تاربيەلەنۋشىلەردىڭ جاعدايى كۇردەلى بولعان. 1975 جىلى سالىنعان ەسكى عيماراتتا ورىن تاپشىلىعى قاتتى سەزىلگەن. نورماتيۆ بويىنشا 125 ورىنعا ەسەپتەلگەن نىساندا 290 بالا تۇرعان. سونىمەن قاتار ينفراقۇرىلىم دا ابدەن توزعان.
جاڭا جاتاقحانا 300 ورىنعا ارنالعان. جالپى اۋدانى 8288،70 شارشى مەتردى قۇرايتىن عيمارات تولىقتاي زاماناۋي تالاپتارعا ساي سالىنعان. 3،5 گەكتار اۋماقتا ورنالاسقان نىسان اۋماعىندا 800 شارشى مەترلىك فۋتبول الاڭى، ۆوركاۋت ايماعى، 450 شارشى مەترلىك ويىن الاڭدارى جانە 200 شارشى مەترلىك دەمالىس ورىندارى قاراستىرىلعان.
عيمارات ىشىندە ۇلدار مەن قىزدارعا ارنالعان بولەك تۇرعىن بلوكتار، جابدىقتالعان مەديسينالىق ءبولىم، كەڭ ويىن بولمەلەرى جانە بالالارعا قولايلى، ءقاۋىپسىز ءارى دامىتۋشى ورتا قالىپتاستىرۋعا ارنالعان وزگە دە بولمەلەر بار.
بەرىك اسىلوۆتىڭ مالىمەتىنشە، بۇل جوباعا مەملەكەت باسشىسىنىڭ تاپسىرماسى بويىنشا ارناۋلى مەملەكەتتىك قوردان 2،6 ملرد تەڭگە بولىنگەن. اتالعان قورعا زاڭسىز شىعارىلعان اكتيۆتەردى قايتارۋ جانە قايتارىلعان مۇلىكتى ساتۋدان تۇسكەن قاراجات جيناقتالادى.
سونداي-اق باس پروكۋراتۋرا قايتارىلعان قاراجات ەسەبىنەن ەلدى مەكەندەردىڭ ينفراقۇرىلىمىن دامىتۋ جۇمىستارى بۇكىل ەل بويىنشا جالعاسىپ جاتقانىن اتاپ ءوتتى. بۇگىندە شامامەن 500 ملرد تەڭگەگە 440 الەۋمەتتىك جانە كوممۋنالدىق نىساننىڭ قۇرىلىسى قارجىلاندىرىلعان. ونىڭ 319-ى پايدالانۋعا بەرىلگەن. ولاردىڭ قاتارىندا مەكتەپتەر، اۋرۋحانالار جانە سۋمەن جابدىقتاۋ جۇيەلەرى بار.
بەرىك اسىلوۆ قايتارىلعان ءاربىر تەڭگە قازاقستان ازاماتتارىنىڭ يگىلىگىنە قىزمەت ەتۋى ءتيىس ەكەنىن اتاپ ءوتتى.
