رەسەي مەن سولتۇستىك كورەيا قول قويعان ءوزارا قورعانىس شارتى ەكى ەلدىڭ سوعىس بولعان جاعدايدا بىر-بىرىنە دەرەۋ اسكەري كومەك كورسەتۋىن تالاپ ەتەدى. ساراپشىلاردىڭ بولجاۋىنشا سولتۇستىك كورەيا بۇل شارتقا سۇيەنە وتىرىپ، بۇرىنعىدان دا باتىل ءىس-قيمىلعا تاۋەكەل ەتۋى مۇمكىن. ال جاعدايدىڭ بۇلاي دامۋى شىعىس ازيادا قىرعي-قاباق سوعىسى كەزەڭىندەگى شارتتىڭ قايتا تۇزىلۋىنە يتەرمەلەۋى مۇمكىن.
پۋتين مەن كيم قول قويعان جان-جاقتى سەرىكتەستىك تۋرالى شارت قاجەتتى رەسۋرستاردى ءوزارا ءبولىسۋ، ءوزارا جەدەل اسكەري كومەك كورسەتۋ تالاپتارىن قامتيدى. ۇزاق ۋاقىت وقشاۋلانعان سولتۇستىك كورەيا ءۇشىن بۇل ۇلكەن قولداۋمەن تەڭ. يادرولىق جانە زىمىران سىناقتارى ارقىلى وڭتۇستىك كورەيا مەن جاپونيانى ۇدايى الاڭداتىپ كەلە جاتقان پيوڭياڭ الداعى ۋاقىتتا بۇنداي ارەكەتتەرىن ءتىپتى دە جيىلەتە ءتۇسۋى بولجانۋدا.
ەگەر سولتۇستىك كورەيانىڭ ارانداتۋ ارەكەتتەرى بەلسەندى جالعاساا بۇل امەريكا قۇراما شتاتتارى مەن ونىڭ ايماقتاعى وداقتاستارى بولعان جاپونيا جانە وڭتسۇتىك كورەيا اراسىنداعى بىرلەسكەن ارەكەتتەردى ارتتىرادى. ياعني، جاپونيا، وڭتۇستىك كورەيا جانە امەريكا قۇراما شتاتتارى ەندى رەسەي مەن سولتۇستىك كورەيانىڭ قورعانىس شارتىنىڭ قاۋپىنە قارسى تۇرۋ ءۇشىن قوسىمشا اسكەري كۇش توپتايدى نەمەسە اسكەري نىساندارىن كوبەيتۋى بەك مۇمكىن. ال بۇل ايماق قىتايعا جاقىن بولعاندىقتان بەيجىڭ ۇدايى ونىڭ قىسىمىنا تاپ بولارى انىق. وسىلايشا كورەي تۇبەگىندەگى شيەلەنىس بارعان سايىن ۋشىعا ءتۇسۋى مۇمكىن. ءقازىر ساراپشىلار ايماقتاعى مۇنداي جاعدايعا جۇڭگو ارالاسا ما، جوق پا دەگەن ماسەلەگە جاۋاپ ىزدەۋدە.
جۇڭگو ءوزىن الەمدى جاۋلاسقان لاگەرلەرگە بولۋگە قارسى تۇراتىن بەيبىت ەل رەتىندە كورسەتۋگە تىرىسىپ كەلەدى. كەرىسىنشە، بەيجىڭ امەريكا قۇراما شتاتتارىن ءوز وداقتاستارىن توپتاپ، الەمدى جاڭا قىرعي-قاباق سوعىسقا يتەرمەلەدى دەپ ايىپتايدى. ال رەسەي مەن سولتۇستىك كورەيا قىتايدىڭ ەڭ جاقىن ستراتەگيالىق سەرىكتەستەرى. ولار اراسىنداعى كەلىسىم بەيجىڭ ءۇشىن ودان دا كوپ قيىندىقتار تۋعىزادى دەپ بولجاۋعا نەگىز بار.
تاراتا ايتار بولساق، الگىندەي شارت جۇڭگو، رەسەي جانە سولتۇستىك كورەيا اراسىنداعى ءۇشجاقتى ىقپالدى كۇشەيتەدى. بەيجىڭ بولسا ءوزىنىڭ ستراتەگيالىق قارسىلاستارىنا قانداي دا ءبىر ەلدەرمەن تۇبەگەيلى وداق قۇرعىسى كەلمەيدى. ياعني لاگەرلەرگە جىكتەلۋ بەيجىڭ اۋلاق بولۋدى قالايتىن نارسە. سوندىقتان الداعى ۋاقىتتا جۇڭگو ءۇشىن ەكى سەرىكتەسىنىڭ ءىس-قيمىلدارىنا ۇدايى قاداعالاپ وتىرۋعا تۋرا كەلەدى.
